Kaban ni Atty. J. B. Jimenez: P A G L A U M . . . . . . .SA. . PA S K O . . N G A. . . . G I B A G Y O. .

Unsaon Ang Pasko, Human Sa Bagyo ?

Unsaon Ang Kalipay Taliwala Sa Daghang Patay Nga Tawo ?

Hain Ang Luna Sa Bisan Gamay Nga  Sidlak Sa Paglaom ?

Taliwala Sa Kalibutang Giliminan Sa Dulom?,

Mag-usa Kami Nga Nailo Sa Ginikanan,

Sa Mga Balo Nga Nag Inusara Na Man ?

Asa Namo Pangitaa Ang Kahayag ?

Sa Kinatung-an Sa Mga Pagsalig nga Nayagyag ?

Unsaon Man Namo Pag-Atubang Sa Noche Buena ?

Ning Labihan Ka Pit-os Ug Kapait Nga Panahona ?

Mosalig Ba Kami Sa Mga Saad Sa Panahon ?

Human Maguba' Ang Kinabuhing Banikanhon,

Karong Napasapasa Naman Ang Mga Pagsalig Ug Gugma,

Sa Yutang Gihikawan Sa Pagmahal Ug Pag Amoma ?

Motoo Ba Kami Sa Mga Panumpa Nga Salingkapaw ?

Sa Mga Tawong Pamolitika Ang Nagpatigbabaw ?

Magpaabot Pa Ba Kami Sa Mga Saad Nga Bakak,

Karon Nga Ang Tanang Mga Paglaom Namo Humana Mahunlak?

Aduna Pa Bay Bisan Anino Sa Kalipay ?

Nga Ning Mga Samarang Kasingkasing Maka Humpay?

Tugotan Ba Nato Nga Ang Tanang Paglaom I-anod ?

Sa Baha Nga Naghatod Sa Atong Pasko Sa PagkakaLunod?

Tugotan Ba Nato Nga Ibanlas Na Lamang Sa Kapalaran ?

Hangtod Ang Dignidad Ning Kinabuhi Nga Inayran ?

Magpatighulog Na Lamang Ba Kita Didto Sa Bung-aw,

Ang Tanang Mga Baroganan Itugyan Tang Mahanaw?

Sa Pagkalumpab Ba Sa Mga Pangandoy Ta Ug Damgo?

Iwakli Na Lamang Nato Ang Tanang Pagbati Ug Kahi-amgo ?,

Ang Pasko Ba Nga Gasa Sa Halangdong Langit?

IpadpadNa Lamang Ug Sa Kapakyas Mahasangit?

ADUNA PA BA'Y NAHABILIN NGA PAGLAUM ? ? ?

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)