TANGKAL

dam-okanan, sudlanan, butanganan,

sa mga damgong nakuhaan ug kagawasan,

sa kanhiay, manok, baboy, kalanggaman,

ug uban pang mananap sa kalasangan,

atong makit-an kon tangkal hisgotan,

lahi sa binag-ong kasaysayan, mga kukhan,

halangdong tinugyanan, mga mat-an,

gitagaag makabungog nga pagsalig sa katawhan,

hasta tangkal gihimo na nilang pahulayanan,

binilyong pangoykoy sa bahandi sa katawhan,

gisorikbot, gikuot, halangdong saad gikalimtan

nga kon tinud-on lang unta sa kagamhanan

ang patas nga pagpatuman sa balaod,

tangkal mahimo nilang pinuy-anan sa kahangtoran,

kon balaod ipatumang walay pagpinig sa maligsan,

tigulang, artista o mga yanong binuhat sa katilingban

KAHAYAG