GILUWAS SI PIDOT NI SENYOR SANTO NIÑO

GILUWAS SI  PIDOT NI SENYOR SANTO NIÑO

Nagdako si Pidot sa kinabuhi nga pinasagdan. Libod suroy, barkadista ug bisyoso.

“Mao nay angay nimo! Wala kay kangho! Gadako lang imong  pabawnan! Dili ka masugo sa buluhaton sa panimalay!” singgaak ni Noy Kunot. 

“Pero, unsaon ko man naanad naman ko  sa buhat sa  pagkamangunguot  ug pagkabutangero. Nagsalig ra ko ug  pagpanghingi  sa mga tsuper sa sakyanan pasaheroan sa dalan Colon. Maayo na lang gani nga nakabiya ko sa bisyo’s pagamit ug shabu kay nahadlok kos tokhang!” tubag ni Pidot dala pinakunot sa iyang agtang.

“Maminaw ka nako kay ako ang mas nahibawo kay kanimo. Ako ang imong amahan.” Pasabot ni Noy Kunot.

“Ah, kasaba. Molakaw nako  oy. Kanindot pa unta sa akong pagnakinnakin dinhi sa pantawan samtang naglantaw sa mga entrante sa sinulog 2017. Kanindot tan-awon sa mga mananayaw. Mga mamords ra ba kaayo. Molakaw na ko.” pulong pa ni Pidot dayong biya.

Wala na pamatia pa ni Pidot ang tagawtaw sa iyang amahan. Mipaturatoy siya pagawas sa ilang panimalay.  Magbagdoybagdoy siya.  Mangita ug kapanibaan.

“Maayo pa, manguot ko. Maayo ron ang tiyempo. Daghan kaayo ang magdanghag lang, Dili mag-amping sa ilang mga bag ug bulsa. Nindot kaayong kuotan.” Misuol ang kabadlongon ni Pidot.

“Psssssst…Bay Pidot, maayo kay nakit-an ka namo.” Sampit  pa ni Oka, ang banggiitang negosyante ug pulbos sa Duljo, Fatima. 

“Bay Oka, ikaw man diay ni. Ngano man diay?”

“Dako ron ang kita, mamaligya ta’g gidili  nga drugas sa Mango Square. Maayo didto daghan ang mga batan-on. Maghitak ang mga mangita ug pulbos.” Nagngisi nga namulong si Oka.
“Dili ko mokuyog ug pamaligya Oka. Delikado na kaayo ron. Linibo ang gipakatap nga pulis sa lainlaing suok sa dakbayan. Masikwate unya ko. Kamo lang.  Bahala na mo diha kay manguot ra ko ron. Maayo rong panahona  daghan kaayo ang kuotonon.” Tubag ni Pidot dayong talikod ni Oka.

Samtang gisubay ni Pidot ang  dalan sa  Jones Ave., padulong sa simbahan sa Santo Niño may nakita siyang usa ka inahan nga nagkugos sa iyang masuso. Naghilak.  Daw may gipangita. Iyang giduol.

“Day, naunsa man diay ka?  May nahitabo ba?” pangutana ni Pidot.

“Ang akong usa ka  anak, nawala. Nabuhian nako samtang nanglakaw mi padung na unta mi  manguli sa Guadalupe gikan nanimba. Nagkabayayat man gud kog kugos ug patutoy ning akong masuso.  Hasta akong pitaka nadala raba sa akong anak. Nawala.  Huhuhu. ” Mingaab ang inahan sa bata.

Hilom nga mibiya si Pidot. 

Naabot si Pidot sa sunod iskina.

“Mao kini ang tiyempo.  May duha ka babaye nagtapad. Nagtalikod sila nako.  Ang usa,  batan-ong babaye  nagkarsones. Nalingaw silang duha ug tan-aw sa  nanayaw sa huni sa sinulog.  Nisiwil sa luyo nga bulsa sa  karsones sa batan-ong babaye  ang selpon.  Jackpot.  Murag  iPhone 7.  May tapad pud siyang babaye nga wanggets nga nagsab-it ug shoulder bag sa iyang abaga. Murag puno kaayo.  Namungingi siya sa  alahas.  Ayos.  Manukad na ko, sakdapan nako ning duha. Usa ra ni kahulbot.” Tukma nga padulong nang hasmag si Pidot sa iyang nakita nga kuotonon, dihang may nabati siyang may mikabyon sa iyang bitiis. 

“Yamat ra, kinsa man ning mikabyon.?” Nakalitan si Pidot.

“Bata man ni. Sa akong tan-aw mga upat ka tuig pa. Naa siyay gibitbit nga pitaka?” hilom nga namulong si Pidot sa kaugalingon.

“Hu-hu-hu” mingaab ang bata.

“Oi naunsa man ka?”

“Nabiyaan ko ni mama”

Nasangit ang panan-aw ni Pidot sa gidala sa bata. Usa ka pitaka.

“Kasuwerte, ang pitaka na gyuy miduol nako. Akong kuhaon.”

“Ayaw kuhaa ang pitaka. Gipagunitan ni ni  mama nako. Mao ni ang manalipod nako pung pa niya.”
“Ah mao ba. Akong ning  huwaman ha. Pinugos nga gikuha   ni Pidot ang pitaka gikan sa kamot sa bata nga iyang  giwakli.

“Hehehe, pagkasuwerte.”

Dili layo sa nahimutangan ni Pidot, ang duha ka babaye nga nakit-an ni Pidot giduol ug unipormado nga mga polis. 

“Mam, gipakuha namo ni General. Naghulat siya ninyo sa iyang buhatan sulod sa kampo. Adto mo maniudto. Gipanid-an ra mo sa among mga kauban nga pulis nga  nagpaatbang lang. Safety mo. Daghan ming mga pulis  nga gipakatag. Kanang  naninda ug balot sa atbang  pulis na.  Kanang  namaligya ug kawo nga buli sa inyong kilid pulis na. Ug andam nang mamusil kon naay manulis nga musukol kon dakpon”

“Salamat ha nga naabot, na mo. Daghan raba kuno ang mga mangunguot dinhi.” Pulong pa sa wanggit nga babaye.

Dili ka mabalaka Mam. Daghan ron ang mga pulis nga nagkatag. Sa may Mango Square gani may napusilan namo didto ganina nga namaligyaay ug gidili nga druga  shabu.”

Namugnaw si Pidot sa iyang nadungog. Nakuyawan siya. Maayo na lang nga gikabyonan siya sa bata maong napugngan siya sa iyang tuyo nga manguot ug selpon.

“Ah dong, dali kuyogan tika sa imong mama. Ako to siyang nakit-an ganina.”

“Salamat Noy ha. Ang  pitaka nga akong gigunitan ganina  Noy,  naa man na sa imong kamot. Ablihi lang na”

Ayaw Dong oi. Imoha man ni.

“Ablihi lang na.”

Tuod man giablihan ni Pidot ang pitaka. Ug dili siya makatuo sa iyang nakita. Ang imahen ni Senyor Santo Niño nga nagngisi  ang gibutang sa sulod niini  ug wala nay lain pa.

Nanglugmaw ang luha sa mga mata ni Pidot. Nakaamgo na siya sa dakong sayop sa  iyang pagkatawo. Giluwas siya ni Senyor Santo Niño.  (KATAPUSAN).

Comments

Popular Posts