Kaban ni Atty. J. B. Jimenez: ALKANSYANG BAGOL

 Alang Kanimo,Kining Dugay nang Inampingan,

Pangandam Unta Sa Imong Kinaadman,

Pagka Hagbay Pang Kini Tinipigan,

Kay Imong Damgo Ang Gipahinungdan.

Apan Alang Usab Kanimo Nga Kini Buk-on,

Bisan Dili Pa Unta Tukma Nga Panahon,

Kay Sa Usa Lamang Ka Kidhat Kon Imong Pangayoon,

Dungog Ug Bahandi, Andam Kong Ipahiuyon.

Andam Kong Utaangon Ang Mga Gutlo',

Aron Ang Himaya Imo Na Nga Makutlo',

Kay Kon Dili Na Kapugngan Ang Imong Mga Mulo','

Ang Tinipigan Ako Nang Ipaanod Sa Imong Mga Agulo'.

King Lawas Ug Kalag Daw Usa Ka Alkaansyang Bagol,

Nga Inampingan Kay Panagang Sa Kalisod Ug Kaguol,

Apan Buot Mong Buk-on, Aayw Pagmaakuli Pag Duol,

Andam Ug Tagana, Pag Humpay Sa Naga Ul-ol.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)