Kaban ni Teofy del Mar: MGA BALAK SA BLANKO NGA PAPEL

Naaninag ko sa usa ka blanko nga papel

Ang mga larawan nga dili makita.

Nabati ko gani ang pinitik sa kasingkasing

Sa mga balak nga gipanamkon pa sa hunahuna.

Ug nagkinto ang mga bulos sa bidlisiw

Nga milusad sa puting baybayon.

Samtang nalantawan ko sa kasadpan,

Ang pagbaiid sa kilumkilom sa gidukang bungtod.

Ang mga takna daw mga langgam nga nanglupad

Nga gilutos sa daghang kinabuhi.

Giampo ko nga dili kini masangit sa gihay sa kangitngit,

Ug kahubsan sa pinitik ang dughan.

Daghan... daghan kaayong mga larawan

Nga mitumaw sa blankonga papel.

Nakita ko si Nemesis* nga mibakyaw sa iyang kamot

Aron pagsilot sa nakasala sa mga Bathala.

Gani, daw nadungog ko si Ranudo nga nagbalak

Sa iyang "Pag-usara". Ug nakita ko usab

Ang bayhon sa akong amahan nga nagsapnay

Sa iyang mga damgo alang kanako...!

Ug mitulo ang akong mga luha sa kahinugon

Nga nagtan-aw sa mga aninong bulawan

Nga ang paghandom ko na lamay makahikap;

Ug makahanggap sa alimyon sa panahong nangalarag.

Sa balanko nga papel nakita ko ang dagway

Sa kagahapon; ug ang amag sa ugmang nagsingabot..!

Nakita ko kon unsa kalapad ang wanang sa kahantoran;

Ug ang walay kinutoban sa pag;handoraw!!!

_______________________ 

*Diosa sa katarong sa karaang panahon

  nga maoy tigsilo sa nakasala sa mga Bathala.

(Bug-os ang pasalamat sa  KAHAYAG  ngadto sa nagpaambit ning maong   balak   nga si  TEOFY DEL MAR. Usa siya ka tadhan nga magbabalak nga nabantog dili  lamang sa Sugbo kon dili sa ubang bahin usab sa atong nasod. Natudlo siya isip pangulo sa inilang hugpong sa mga  magsusulat ginamit ang pinulongang binisaya, "LUDABI" (Lubas sa Dagang Binisaya nga natukod kaniadtong 1956 sa mga magsusulat, magsisibya, ug mag-aawit nga Bisaya sa Dakbayan sa Sugbo kansang panlantaw ug  tinguha mao ang pagpalambo sa pinulongang Binisayang  Sinugboanon ingon man sa  arte ug kulturang Bisaya.). Daghang bangga sa panulat ug balak ang malamposon niyang nalambigitan. 

Dili pa lang dugay,  nakadawat ug pasidungog kining maong garay niadtong miaging bulan sa Oktobre 2012,  isip Kampeon sa  tigi sa sinulatay  sa balak nga gipasiugdahan sa BATHALAD-MINDANAO, INC.. Gihimo kini sa hawanan sa  Cagayan de Oro City  diin ang mga maghuhukom gisalmotan sa mga iladong magsusulat sama kanila ni Atty. Junne Canizares, magsusulat ug Eninglis ug Binisaya ug kanhi Literary Editor sa Bisaya Magasin nga tua na magpuyo sa Manila isip usa ka retiradong nga maghuhukom. Lakip na usab sa mga maghuhukom mao ni Atty. Cesar Kilaton, Tigbitang sa Dagang Foundation Inc., (AKADEMYANG BISAYA) ug si Don Pagusara, nga atua na manimuyo sa Davao isip usa usab ka banggiitang magsusulat sa balak ug sugilanon nga Binisaya ug Eninglis.).