Kaban ni Atty. J. B. Jimenez: KINSA ANG TULO KA KAWATAN SA BAG-ONG PANAHON?

Kinsa ang Nangawkaw Sa Mga Bahandi ?

Kinsa Ang Sa Politika Namuhunan Ug Pagbudhi ?

Kinsa Ang Namug-ok Sa Gahum Ug Nagdumili,

Nga Ang Demokratikong Pamaagi Sa Tawo Iuli?

Kinsa Ang Nangagaw Sa Yuta' Ug Kinaiyahan ?

Kinsa Ang Misolo Sa Mina Sa Mga Kabukiran,

Kinsa Ang Nangangkon Sa Bahandi Sa Kadagatan?

Kinsa Ang Mga Lampingasang Mipuril Sa Kalasangan?

Dili Lamang Mga Bahandi Ang Gikawat,

Hangtod Gahum Ug Dungog Gi-IYAWAT,

Mga Way Tanlag Ni Gugma Nga Mga Binuhat,

Maoy Nagmugna' Sa Kasakit, Kalisod Ug Kabug-at.

Kon Kaniadtong Karaang Panahon,

May Barrabas Nga Labing Badlongon,

Kon May Estas Nga Kawatang Mapagarbohon,

Ug Dimas Nga Kawatang Mapahi-ubsanon,.

Sa Pagka Karon, May Kawatang Lampingasan,

Kahakug Ang Nagamando Niining Kalibotan,

Gihakop Man Ang Mga Bahandi Nga Tanan,

Mga Salapi, Yuta' Hangtod Kinaiyahan,

Gipaka Ulipon Ang Ubang Mga Igsuon,

Gi-ilugan Ang Uban, Ang Tanan Buot Hakpon,

Tibuok Kalibotan Buot Niyang Panag-iyahon,

Walay Kalooy, Walay Puangod, Malimbongon.

Gipanag-iya Na Ang Bahandi, Gihakop Pa Ang Politika,

Buot Maghari Sa Katilingbang Walay Demokrasya,

Tanang Kabanay , Kabulig Gipalingkod Sa Bureaukrasya,

Aron Magharing Diktador Ug Wala Nay Mo Kontra.

Unya Kon May Eleksyon, Kawaton Pa Ang Resulta,

Mga Tawong Kabus Pamaliton, Ipaagi Sa Kwarta,

Kon Di Madala, Terorismo Ang Katapusang Taktika,

Pinatyanay Ang Pagdaog, Nagkadugo' Ang Orna Ug Balota.

Kon Makalingkod Na Bawion Sa Mga Kontrata,

Obras Politikas, Tikas Tikas Sa Tulay Ug Karsada,

Hangtod Gani Ang Pagpasulod Sa Mga Maestro'g, Maestra,

Limbongon Pa Bisan Ang Igpapalit Ug Tisas Ug Pisara.

Mo Nga Kining Nasod Magbaguod, Way Uswag,

Mga Tawo Nanglisod, Mga Politiko Lamang Ang Luag,

Kanus-a Pa Kaha Mapuo Kining Mga Itom Ug Kalag?

Hulaton Pa Nato' Nga Kining Nasod Dugo' Ang Mobungkag?








(Bug-os ang pasalamat sa  KAHAYAG  ngadto sa nagsulat sa  garay     nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)