Kaban ni Inting Botikol (JSL): HUPAS NA ANG KATAHOM NI SAYONG


Uy, si Nitong man to kuyog ang ikaduha niyang asawa nga si Kolasa. Tingali’g mangumpra to sila para sa ilang tindahan sa lungsod,” nakatuaw si Sayong sa hilom.
Bag-ohay pa lang siya nga nakatapos og kaligo ning sayong kabuntagon.

Lima na ka tuig siyang nabiyuda sa bana niyang si Dolfo nga namatay sa urom. Mositenta anyos na ang iyang edad ug ang kauban niya sa panimalay mao ang bugtong anak nila ni Dolfo nga si Kikay nga wala pa gyud maminyo hangtud karon sa edad nga singkuwenta anyos na.

Nanumbalay sa pangisipan ni Sayong sa pagkadalagita pa niya kaniadto nga usa si Nitong sa mga naninguha niya apan wala’y suwerte kay si Dolfo man gyud ang iyang nabana bisan og palahubog, apan mapinanggaon man usab kini kaniya.

Tinuod ubay-ubay usab ang mga kalakin-an nga nadani kaniya gumikan sa pagkalamurok sa iyang kaapingan, pagkabigot sa iyang kalawasan, inubanan sa nagtuybo niyang duha ka bulkan sa iyang dughan. nubanan usab kini sa hamis niyang kutis kaniadto ug sa mga undanong mga paa ug pagkaigwad sa iyang sampot.

Apan igo lang siya sa paghandum ning tanan kay lahi na man siya karon, Senior Citizen na siya.

Puti na ang iyang buhok. May kunot-kunot nang mibathay sa iyang agtang ug kaapingan.

Medyo piyahok na ang iyang kaapingan. Wala na ang pagkalamurok niini.
 Nangantiyohos nga degrado na usab siya. Luya na ang iyang mga lutahan ug wala na ang kanhiay nga kaabtik ug kahimsog sa iyang kalawasan.

Para mintinar sa iyang kalawasan, may giinom na siya nga “herbal capsules” matag karon ug unya.

Samtang nagsil-ing si Sayong sa iyang hitsura sa espiho, nagkanayon siya, “hupas na gyud diay ang akong katahum ug pagkamadanihon nunot sa pagpangligid sa panahon!”

Busa, ang edad ug pamayhon sa tawo maapsan gyud diay sa paspas nga pagtuyok sa panahon sama kang Sayong ning atong sugilanon! (Kataposan)



(Bug-os ang pasalamat sa  KAHAYAG  ngadto sa nagsulat sa  artikulo nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo sama sa Banat News isip magtatampo ug mga binisayang artikulo ug  uban pang mga tagik sama saa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos. Nigawas sa Banat News kining maong sugilagming kaniadtong Septembre 8, 2012)

Comments

Popular Posts