MAPAUBSANON SI NOY SIAKOY

ang pagpaubos  magdala ug pasensiya

dili gayud mopagawas ug kantalita,

hubo sa minaldito ug minaldita

ang tanan ipaagi sa ngisi ug kanta,

bisan kon tuhilon mo man ang ilong aron hagiton,

wala kay madungog ug makita nga pagtukon,

apan hinuon, kining tanan sabakon sa tam-is nga pahiyom,

timaan sa lunlon nga pagkamapahiubsanon.

"Sus unsaon man ni nato? Kakutas na baya." ni Inday pa nga daw sa nahutdan sa pailob. 

"Uhmmp...Mao na gayud  kini ang kamatuoran Inday. Sama sa  gugma, dili kini  kapoyon, dili mamili.  Bisag unsaon,  andam ug tagana  matag kablit sa panahon." ni Noy Siakoy pa nga kalma kaayong namulong nga nagdala ug gamay'ng pag-agumod. 

"Naunsa man ka Noy, kanunay ka na man lang magpaubos?" ni Inday pa samtang naibabaw.

"Pasensyahi Day, unsaon naabtan na man intawon sa lumot kining akong lutahan. Apan ayaw kabalaka Day, kay kon hagiton mo kining nanggungis kong pangedaron, pakatam-ison ko ang pagpaubos aron sabakon ko ang mahagiton mong katahom." pulong ni Noy Siakoy nga nagngisi,  naghayang samtang  nagsud-ong ni Inday Manghihilot nga iyang gipahilot para pawala sa iyang panuhot. (KATAPUSAN).