Kaban ni Teofy del Mar: PUNGPONG SA BULAK ALANG SA ADLAWONG NATAWHAN

Dear Ondo,

MALIPAYONG SUMAD SA ADLAW NGA NATAWHAN, DO. Hinaot nga ang matag adlaw nga moabot sa imong kinabuhi magdala og banagbanag. Aniay pungpong sa mga bulak nga ihatag ko  kanimo, gilasohan ko kini sa mga bulok sa bangaw nga akong nakutlo gikan sa panagbagat sa bidlisiw ug habuhabo.

Hinaot nga daghan pang sumad sa adlaw mong natawhan ang moabot sa imong kinabuhi.

Imong ig-agaw,

TEOFY

(Bug-os ang pasalamat sa  KAHAYAG  ngadto sa nagpaambit  nga si  TEOFY B. DEL MAR nga kasamtangang nanimuyo sa dalan M. Ceniza, Maguikay, dakbayan sa Mandaue. Usa siya ka tadhan nga magbabalak nga nabantog dili  lamang sa Sugbo kon dili sa ubang bahin usab sa atong nasod. Natudlo siya isip pangulo sa inilang hugpong sa mga  magsusulat ginamit ang pinulongang binisaya, "LUDABI", Lubas sa Dagang Binisaya nga natukod kaniadtong 1956 sa mga magsusulat, magsisibya, ug mag-aawit nga Bisaya sa Dakbayan sa Sugbo kansang panlantaw ug  tinguha mao ang pagpalambo sa pinulongang Binisayang  Sinugboanon ingon man sa  arte ug kulturang Binisaya. Daghang bangga sa panulat ug balak ang malamposon niyang nalambigitan. Ang iyang  kainila sa natad sa balak ug pagkamagsusulat ginamit ang pinulongang binisaya nakakulit na sa iyang pangalan sa hawanan sa mga bantogan.)