ANG KABO NI ESTONG

Ang kabo ni Estong

Ang panahon dili gayud mahibaw-an. Si Estong   nga nag-inusarang anak nila ni Don Toribio  ug Doña  Marta  nga taga Singson Village, Guadalupe,  maoy buhing ehemplo sa panag-ingnan nga ang kinabuhi sama sa untol sa bola, karon anaa ka sa itaas ug  unya ganuyon ka paubos. 

Tuig 1977, natawo si Estong  nga nagtangag ug kutsarang  bulawan.  Sa sayong banagbanag sa iyang  kinabuhi, anaa na kaniya ang tanan. Pagkaon, harianong panimalay, salapi, kotse ug uban pa.

Sa subrang pangga sa iyang ginikanan, si Estong wala manumbaling nga makat-on sa  buluhaton sa panimalay sama sa pagpanghugas sa iyang kinan-an, pagpanglaba sa iyang bulingon, ug lung-ag ug uban pa nga kuri-kurion.

Tulin nga niligid ang panahon, si Estong, nahuman na sa pag-tungha sa kolehiyo ug nakuha ang  kursong Mass Communication  apan wala   gihapon makat-on sa pagbarog sa kaugalingong tuhod. Kanunay lang gihapon kining magpangayo sa iyang ginikanan ug walay tihik-tihik  nga mowaldas sa salapi nga dili niya hinaguan. Tapolan ug hakog si Estong.

Usa ka gabii niana, gitukaw ang iyang  hinanok   sa balita nga naaksidente sila si Don Toribio  ug Doña  Marta ug nitaliwan na kini sa dayon.  Tungod sa kalit nga hitabo, si Estong  nabag-ohan.. Siya na ang nagdala sa negosyo sa iyang ginikanan. Nahimutang sa iyang mga kamot ang pagdumala sa lapad nilang kalubihan sa dakbayan sa Bogo, Cebu ug  kan-anan sa may tumoy nga bahin sa dalan Andres Abellana Ext. 

Si Estong

“Hehe,  mao ni akong gusto. Wala nay makabuot nako. Sige, bay Ronnie, bay Bebe,  hutdon ta ning mainom.  Mangita   ta  ug  kalingawan gikan dinhi sa  imnanan.” sagol hinubog nga pamulong ni Estong atubangan sa iyang mga higala nga sila si Ronnie  ug  Bebe, nga anak usab ug adunahang pamilya.  Tungod sa kahakog, sa panahon nga duolon sa mga kaparyentehan nga magpakitabang kaniya, si Estong dili gayud mahangyo. Bisan diyot dili makahatag. 

“Estong hunonga na imong pagkabisyoso, nalukop ka na lang ug kuyog sa imong mga barkada. Wala  ka na gani makaalinggat nako diri.” masulob-ong pulong ni Brenda ngadto ni Estong. “Ay, sus kanimo Brenda. Hala pangita diha ug imong kalipay aron dili ka magproblema nako. Wala man bitaw tay anak.” pintok nga pamulong ni Estong dayong biya sa iyang asawa.  Samtang  si Brenda  ningaab. Nagdibal ang gibating kahiubos ngadto ni Estong. 

Wala madugay, nitakilid ang negosyo nga gidumala ni Estong tungod sa iyang pagkatapolan, pagkahakog  ug pagkawalay kabangkaagan.  Giprenda ni Estong ang yuta nga namungingi sa daghang lubi ug  wala na malukat pa.  Samtang, ang kan-anan nga  hugupanan sa mangaon ug lugaw matag hapon, nadala usab kini sa ratsada.

Kanunayng mauwanan, mainitan. Walay pinuy-anan. 

“Kapait diay niining mag-inusara sa kinabuhi.  Gibiyaan nako sa akong  asawa nga si  Brenda,  gihuboan pa gyud ko sa tanan nga kabtangan sa akong mga gipang-utangan. Giyam-iran sa mga tawo.” hagawhaw ni Estong  sa kaugalingon nga puno sa pagmahay. Nahisama na siya sa irong walay tag-iya.  Nikag-at.  Nagkawil-kawil ang dakong kamisin  nga hinatag sa insek  nga tag-iya ug tindahan sa ukay-ukay sa Magallanes. 

Si Estong, nahimong tipik ug kabahin sa mga tawo nga naghuwat ug  sinsiyo nga ihulog sa iyang gibitbit nga kabo sa kilid sa  simbahan sa Santo Rosario.  Kanunayng mauwanan, mainitan. Walay pinuy-anan. (KATAPUSAN). 

(Nigawas sa unang higayon kining maong sugilagming sa Banant News, local nga peryodikong binisaya sa dakbayan sa Sugbo kaniadtong Hulyo 2, 2011, sa Patnubay Online (website),  kaniadto sa isyo Enero 12,  2012,   nataran kini  sa  mga magsusulat nga OFW's, ug sa BISDAK Magasin, kaniadto sa isyo Oktubre 16-31, 2012, magasin nga mogawas kaduha matag bulan ubos sa pagpublikar sa Sunstar Publications. )