Kaban ni Inting Botikol: GIPUKAN NI CORY AQUINO ANG DIKTADOR

Nahimugso si Cory Aquino kaniadtong Enero 25, 1933 didto sa Manila sa mga ginikanan nga Jose Cojuangco ug Demetria Sumulong.

Nakatapos siya sa iyang pagtuon didto sa Amerika diin ang master subject niya mao ang pinulongan nga French ug Mathematics.

Kalit siyang nabiyuda kaniadtong Agosto 21, 1983 diin ang iyang bana nga si anhing Senador Ninoy Aquino, Jr. gipusil-patay diha sa Manila International Airport gikan sa Boston, Massachussets.

Milansar siya isip Presidente sa nasud sa Snap Presidential elections kaniadtong Pebrero 7, 1986 diin iyang gikaatbang si Presidente Ferdinand E. Marcos nga dakung masakiton ug bayente uno anyos na sa gahum sa Malakanyang.

Nagubot ang resulta sa eleksyon niadtong tuiga. Apan gumikan lagi sa People Power sa EDSA, milayas si Presidente Marcos lakip ang iyang pamilya ug mga hinanib sa gabii sa Pebrero 25, 1986 padulong sa Hawaii.

Usa ka biyuda si Presidente Aquino ug wala’y kasinatian sa politika, apan suportado siya sa atong mga katawhan lakip na nila ni Archbishop of Manila Jaime Cardinal Sin, Defense Secretary Juan Ponce Enrile ug Heneral Fidel V. Ramos.

Milingkod siya isip Presidente sa nasud gikan sa Pebrero 25, 1986 hangtud sa Hunyo 30, 1992.

Siya ang ika-onse ug unang Presidente nga babaye sa atong nasud.

Iyang anak si Presidente Noynoy Aquino karon nga maoy nagtimon ug nangulo sa atong nasud.

Kadaghanan nato wala gyud magdahum nga biyuda ra diay ang mopukan ug mosumpo sa usa ka diktador sa atong kasaysayan nga si Ferdinand E. Marcos!

Manghinaut kita nga wala nay lain pang EDSA People Power Revolution nga mopalayas og usa ka diktador sa atong nasud ugma damlag!!

(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos, napatik sa Banat News kining maong artikulong kaniadtong Enero 29, 2012)..