K A I B O G

Pagbati nga modani sa imong mga mata, magpangutana ka, gustong kang makig-ila ila.  

Mokuykoy sa alimpatakan,  mouliot sa imong dughan,  dili ka mahimutang, dili ka makapahimutang. 

Ang binuhat nga mahan-okan sa imong kaibog, mokuha sa imong pagtagad,  dili ka makabalibad.

Mosangpot usab ang kaibog ug kalibog, pagkadili masabot. 

Samtang ikaw mahimuot makakita sa imong naibgan, 

apan kon ikaw maoy makit-an, likayan ka ug dili ba biyaan.

“Asyong,  grabeha pud nimong nakatan-aw nianang batan-ong babaye nga nagpalit ug bulak.” pulong ni Oka ngadto sa iyang higala.  

“Bay Oka, makaiibog man gud. Ikaw bay maibog lalim ba.” dala panghupaw nga tubag ni Asyong.

“Ayaw ug dugaydugay Asyong, dasdas na!” agni ni Oka, samtang nagpadayon sa iyang gibuhat nga pagpanahi ug sapatos isip sapatero.

Wala na makapugong si Asyong miduol sa binuhat nga nakapaibog kaniya.  Nindot ug bantang, sakto sa barog ug kutis porselana ang dalaga nga nakapaibog ni Asyong.

“Day,  pasensyahi ko pero gikuha sa imong  katahom  ang tanan nakong kaibog. Dli ko mahimutang.” daw gigil-asan si Asyong nga namulong. Walay pupamilok.

“Noy, bata pa intawon kaayo ko alang sa imong gipanulti oi. Gusto pa kong motiwas sa akong pagtuon.”sa babaye pa nga nagkalingaw ug pili sa mga nagkadaiyang bulak nga tinda.

“Ayaw kabalaka day, tabangan tika.”

“Motabang pa intawon ko sa akong mga ginikanan.”

Ayaw kabalaka day, tabangan tika.”

“Gusto pa kong mohangop sa hangin sa kagawasan nga walay magbuot nako.”

“Ayaw kabalaka day, tabangan tika.”

“Kon mao kana Noy, palihug pasagdi ko diri ha.

“Haaaaa? Aw unsa man diay to imong gisulti. Nawala gyud ko sa dako nakong kaibog nimo.”

“Hoy, Asyong!!!! Mamauli na ta. Tabangi ko ug bitbit sa atong kinumpra.  Kay naglisod ko ug dala sa uban nakong pinalit!!” singgit sa guwangong babaye dili layo sa ilang nahimutangan.

“Noy, gitawag na ka. Adto na to siya, Tabanganan gyud to nimo. Isog  ra ba kaayo ug tinan-awan. Tabi, kinsa man na siya? pangutana sa dalaga.

“Ah este,  sus Trayenta anyos na nako na siyang gitabangan, akong asawa. Sige ari na ko, Dako pa ra ba na siya ug kumo nako.” dayong biya ni Asyong sa dalaga. (KATAPUSAN).