Kaban ni Atty. J. B. Jimenez: UGMA', TUNGASON KO ANG BAG-ONG BUKID....

Humana ko na mapangahasi nga lat-ason,

Ang pitong lugot ug pitong mga tungason,

Humana ko na labanga ang pito ka salog,

Tapos na ang pagbaktas ko sa mga habog,

Nga Bakilid sa Akong Kapoy Nga Kinabuhi,

Humana ko na Batoki Ang Mga Pag Budhi,

Ugma' Lain Na Sab Nga Bukid Ang Tangaon,

Bugtaw Sa Tingusbawang Lisod Kab-oton.

Talikdan Ko Ang Mga Kaharuhay,

Ipadaplin Ko Una Ang Mga Kahayahay,

Pilion Ko Ang Makutas Nga Pagpanaw,

Aron Ang Pangandoy Akong Ma-aninaw.

Kay didto sa Kina Ibabwan Sa Bungtod,

Nagtago' Ang Ang Mutya' Nga Gigukod,

Pangisgan Kong Asdangon Ang Mga Babag,

aron Lamang Masil-ingan Ang Kahayag.

Ugma', Tungason Ko Ang Bag-ong Bukid,

Sagubangon Ang Kalisod Nga Di Ikasugid,

Isalikway Ko Ang Pagpanuko Ug Pagduhaduha,

Ihiklin Ko Una' ang Kahadlok Ug Kabalaka

Ugma', Hagiton Ko Ang Sukna' Sa Kapalaran,

Inubanan Sa Pag Ubay Sa Balaang Amhan,

Ugma, Sugdan Ko Pag Lat-as Ang Bag-ong Damgo,

Uban Sa Gugma, Kadasig, Paglaum Ug Kahiamgo.

(Bug-os ang pasalamat sa  KAHAYAG  ngadto sa nagsulat sa  artikulo   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK.).