Kaban ni D_BystandeR: DIRIYOT MALUMOS

"Believe it or not," apan tuo na lang aron ta madali. Usa ka dalaga nga gikataho nga nalumos didto sa Marigondon Beach, Lapulapu City kagahapon (05/01/13). ang biktima ginganlan lang ug Gina (tinuod ngan gitago) dalaga ug residente sa Brgy. Gun-ob, Lapulapu City. Matud pa ni PO2 Winston Ybanez nga mga alas 3:00 ang takna sa kaadlawon nakadawat sila ug tawag gikan sa usa ka tourist police ug mipahibalo kalabot sa usa ka babayeng nalumos didto sa Emerson beach resort sa Brgy.Marigondon. Apan dihang miabut didto ang kapolisan kalit lang nawagtang ang batan-ong dalaga kay naulian diay kini ug nabuhi. Miasoy ang usa ka saksi ngadto sa kapolisan nga ang biktima kaubang naligo sa iyang uyab sa maong resort ug milangoy kini ngadto sa lawom luyo sa kahubog sa alak nga iyang nainom. Unya kalit lang mitidlom sa ilawom apan naluwas kini sa kauban ug gisakwat ngadto sa baybayon nga wala nay panimuot ug nahukman nga ipa-"mouth-to-mouth resuscitation" sa usa sa mga rescuer. Busa pag-abot sa rescuer gi-andam na niini ang kaugalingon aron iyang bulhotan ug hangin pinaagi sa iyang baba ang baba sa biktima sa dihang kalit lang kining naulian ug nabuhi, mitimbakuwas kini ug mikaratil ug dagan pahilayo sa dapit. Mapasalamaton ang kapolisan nga nasalbar ang biktima nga wala makatilaw sa gininhawa sa usa ka rescuer.

(Bug-os ang  pasalamat sa KAHAYAG ngadto sa magtatampo  nga si JOHNNY LOVE nga nagkutlo sa paambit gikan sa pamantalaan, BANAT NEWS. Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCANO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 68,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata.)