Kaban ni Richard: KAMINGAW

KAMINGAW

Kamingaw sa payag nga imo’ng gibiyaan,

nga kanhi nahimo’ng saksi,

sa atong mga saad ta og panumpa,

nga giliminan, sa kayahag sa kagabhion.

Pagkasubo palandungon,

ang mga bugon sa kagahapon,

nga naghambin, sa nagbasuni kong galamhan,

 nga gisanapan sa tumang kahingawa og kamingaw.

Buot kong sugkayon, ang tipaka sa kagahapon,

nga nahimong lamdaman sa akong mga damgo,

aron kahulipan ang kamingaw nga hilabihan,

 diha nianang tubod sa naughan’g sapa.

Buot ko untang bukikion ang mga panid sa kagahapon, aron sa adlaw og gabii, ikaw akong mahanduraw,

dungan sa pagtabyog, sa mga lapsaw nga kadahonan, nga maoy saksi, sa nag usdong ko’ng kamingaw.

(Bug-os ang pasalamat sa KAHAYAG ngadto sa nagsulat sa garay nga si  Richard “Ondo” Paghasian, nga nanimuyo sa Casuntingan, dakbayan sa Mandaue. Magsusulat siya ug magbabasa ug mga balak gani, nahimo na usab siyang kampeyon sa  lain-laing bangga sa balak nga iyang gisalmotan.)