Kaban ni Atty. J. B. Jimenez: AYAW KO'G INGNA. . . . .



I
AYAW BAYA' AKO'G INGNA NGA MATAPOS,
NA LAMANG KINING HIMAYA, DAW NAUPOS,
NGA KANDILA' SA TIWALA SA KANGITNGIT,
UG BINLAN MO NA LAMA'G LAMA' SA KASAKIT.
II
AYAW GAYOD INGNA KAY DI KO IKAW TUHO-AN,
KAY SAAD MO BAYA' NGA WALAY KINUTOBAN,
AYAW AKO'G SUGINLI SA MGA LANSIS UG LINGLA,
KAY KINING KAHIAMGO NAGMAYA' PA SA KATINGALA.
III
AYAW AKO'G INGNA NGA MAPULAK LAMANG ANG BULAK,
BISAG NAG SUGOD PA KITA UG YAROK SA DUGOS UG ALAK,
AYAW AKOG INGNA NGA MATAPOS NA ANG MGA AWIT UG SALOMA,
BISAG INIT PA ANG HALOK UG HUGOT PA ANG GAKOS SA PAG AMOMA.
IV
AYAW AKO'G INGNA NGA ANG MGA SAAD MO SALINGKAPAW,
KASINGKASING MONG BAKAKON' UG BAROGANAN MO NGA TAPHAW,
AYAW AKOG INGNA NGA SAMA KA KANILANG MGA MABALHINON,
INIT SA UNA, BUGNAW DIAY ANG LINTUNGANAY NGA KAUGALINGON.
V
AYAW KOG INGNA NGA TALIKDAN MO LAMANG AKO KARON,
NGA MAG INUSARA DINHI SA LAGKAW SA ATONG BAYBAYON,
AYAW KO'G INGNA NGA GIBANLAS NA DIDTO SA MGA LAING LAPYAHAN,
ANG IMONG MABALHINONG PULONG UG HAGUKA' NGA BAROGANAN.


(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)



Comments

Popular Posts