Kaban ni Atty. J. B. Jimenez: KADTONG NAILO NGA LUBNGANAN. . . .

Mingaw, Walay Timik Ang Sam-ang,

Bisan ang Kahilom Daw Nagsalimuang,

Naglagiting Ang Init Sa Udtong Tutok,

Ang Ka Alangiing Daw Punyal Nga Gitusok,

Didto Sa Daplin Sa Dakong Sementeryo,

May Lubong Nga Giliminan Sa Misteryo.

Mingaw Kadtong Lubong Walay Ni Usang Kandila'

Walay Bisan Usa Ka Bulak Ni Luha' Nga Gi-ula',

Mingaw Bisan Ang Ubang Lubong Gahob Ug Saba',

Sa Mga Haguka Nga Pagadye Sa Tabian Nga Baba',

Mingaw Kay Waklay Bisan Usang Binuhat Nga Miduaw,

Nag Tago Ang Mga Kabanay Sa Kaikog Ug Kaulaw.

Kadtong Tawong Gilubong Gitamihid Sa Katilingban,

Inayran Sa Mga Mapahitas-on Ug Gikasilagan,

Katilingbang Tig Pa Kaaron Ingnon Ug Dakong Maot,

Sa Garbo Ug Pag Takuban Nga Sa Tanlag Na Huot,

Nailo Ang Lubong Sa Pag Yukbo' Ug Pag Hinumdom,

Walay Nagtagad Ning Adlaw Walay naga Dumdom.

Kay Dinhi Ning Kalibotan, Buta Ang Katawhan,

Sa Lunsay Nga Mithi Sa Dungog Ug Kamatuoran,

Mahinungdanon Lamang Kanila Ang Mga Bahandi,

Walay Balor Kanila Ang Prinsipyong Way Ikatandi,

Mao Nga Ang Kabus Nga Maligdong Nailo Sa Gugma,

Kay Palitonon Sa Bulawan Ang Tawhanong Pag-amoma.

Pagpa Ka aron Ingnon Ang Kandila Nga Ilang Gi Ugbok,

Mga Bulak Nga Haguka Ang Kahumot Ug Mga Bulok,

Mga Maskara Ang Mga Tarheta Ug Card Nga May Pahumot,

Nga Maoy Nagtago Sa Kasingkasing Puno Sa Pagdumot,

Walay Hinungdan Ang Mga Pungpong Sa Bulak,

Nga Maoy Naga Limin Sa Mga Budhi Ug Bakak.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)