Kaban ni Atty. J. B. Jimenez: PATAYNG BUHI...BUHING PATAY. . . .

Pagka daghan Sa Mga Nag Bagdoy Bagdoy,

Mga Buhi Kono Apan Wala Nay Umoy,

Mga Dagko Ug Mata Apan Walay Nakita,

Buta Ug Bungol Sa Mga Mithi Nga Nanga Lata','

Walay Natimaho-an Bisag Ang Mga Basura,

Nagtumpi Na, Napasa Pasa Ug Naghinobra,

Daw Mga Patay Kay Way Pagpaka Bana',

Wala Nay Balatian, Wala Nay Huna'Huna'.

Pagkadaghan Sa Mga Nagpakabuhi',

Nga Walay Baroganan Mabali Man O Masuhi,

Ubay Ubay Lang Sa Sulog Sa Kapalaran,

Walay Pagbarog Sa Gugma Ug Katarongan,

Mao Ray Gi Una Ang Kalaog Ug Ka Taspok,

Walay Pagpakig Tambabayong Sa Mulo' Sa Tapok,

Iya Iya Ug Isipan, Walay Pakig Alayon,

Dugay Na Sa Kinabuhi, Walay Buot Gihapon.

Maayo Pa Ang Mga Kalag, Aduna Pay Multo,

Kon Mahiubos Maga Himo Ug Katingad-an sa Rebulto,

Ang Mga Buhi Dili Na Makamaong Mahiubos,

Bisag Giyatakan Na Ang Dignidad Niyang Gipaka Busabos,

Dili Na Maka Bati Ug Kahimalingka Ug Kasuko',

Bisag Ang Katungod Gipanamastamasan, Naga Duko',

Wala Nay Nakita Ug Nadungog Nga Mga Hiwi,

Bisag Nagpunsisok Ang Mga Mga Hinakog Nga Gawi.

Pagkadghan Sa Mga Buhi Apan Patay,

Kay Walay Pangandoy, Walay Pag-antus Ug Lahutay,

Nagsalig Lamang Sa Mana Nga Mahulog Sa Langit,

Walay Panlimbasog Bisag Wala Nay Ika Hungit,

Mga Patay Kay Gipasagdan Ang Nasod,

Nga Gituok Sa Mga Mangtas Ug Karon Naga Lisod,

Mga Patay Kay Walay Imik Taliwala Sa Dakong Hagit,

Mga Patay Kay Dili Na Gani Mohilak, Ni Mosinggit.

Mga Patayng Buhi Kay Wala Nay Mga Pangandoy Ug Damgo,

Gikublan Na Ang Tanlag, Halos Wala Nay Kahi-amgo,

Bisag Daghan Ang Nangamatay Sa Pag Palabi Labi,

Ang Iyang Kahakog Mao Hinooy Nag Pasulabi,

Mga Patay KaY Wala Nay Bisan Gamay Nga Gugma,

Nahiklalimot Na Sa Kalooy, Kaikog Ug Pag Amoma,

Mga Patay Nga NagBagdoy Bagdoy Niining Kalibotan,

Walay Nakita, Walay Nadungog Bisag Nag Agulo' Ang Katilingban.


(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)