Kaban ni Atty. J. B. Jimenez: BULAHAN ANG MGA PATAY. . . .

Bulahan ang Wala Nay Kinabuhi,

Nga Dili Na Mahiubos Sa Mga Pagbudhi,

Bulahan Ang Wala Nay Pitik Ang KasingKasing,

Kay Ang Kaguol Ning Kalibotan Dili Na Manalingsing,

Bulahan Ang Patay Na Ang Balatian,

Kay Sa Mga Kasakit, Wala Nay Hibatian,

Bulahan Ang Mga Wala Nay Makitang Mga Pagsulay,

Kay Malinawon Ang Ilang Pagpahulay,

Bulahan Ang Dili Na Makabati Ug Gutom Ni Kauhaw,,

Bulahan Kay Wala Nay Kagahob Kon Di Mga Hagawhaw,

Bulahan Ang Nagpahulay Na Sa Dakong Kahilom,

Kay Ila Ang Kalinaw Nga Labing Lalom.

Bulahan Ang Wala Nay Madungog Nga Mga Pagdaut,

Kay Dili Na Sila Masilo Sa Mga Panghimaraut,

Bulahan Ang Mitaliwan Na Sa Dayon,

Kay Ila Nang Kaugalingon Ang Panahon.

Bulahan Ang Wala Nay Kinaanglang Mag Hago,

Kay Wala Nay Magsamok, Magmando Ug Mag Sugo'

Bulahan Ang Nanag Padayon Sa Ilang Katulugon,

Kay Wala Nay Gutlong Bugtawon Kay Ma Anugon.

Bulahan Ang Kauban Na Sa Labawng Bathala'

Kay Luwas Na Sa Mga Luha Ug Singot Nga Iula,

Bulahan Ang Nakaangkon Na Sa Tuman Nga HImaya',

Kay Ila Nang Natagamtam Ang Kalipay Ug Pagmaya'.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)