Kaban ni Atty. J. B. Jimenez: NASUD KO, NAUNSA KA NA MAN ????

NASUD KO, NAUNSA KA NA MAN ????

I

Usa Ka Paraisong Naguba', Usa Ka Harden Nga Gikanlat,

Usa Ka Saad Nga Napakyas Kay Sa Balas Lamang Nahisulat,

Usa Ka Pangandoy Nga Misangko Sa Mga Kapakyasan,

Usa Ka Paglaum Nga Naga Tangag Ug Kapait Nga Daghan,

Nasod Ko, Naunsa Ka Naman Karon, Ug Asa Ka Man Paingon?

Nganong Nagkagidlay Ka Samtang Ang Mga Mangtas Madaugon ?

II

Gihurot Na Sa Mga Hakog Ang Kinaiyanhon Mong Bahandi,

Igo Ka Na Lamang Nanghagdaw Sa Mga Momho Nilang Naga Budhi,

Gikuso Kuso Sa Mga Luog Ang Imong Yuta' Ug Mga Dagat,

Nailog Na Ang Timog, Ang Silangan, Kasadpan Ug Habagat,

Gikawat Sa Mga Dumuduong Ang Mga Mutya Mo Gidagit Sa Langyaw,

Hangtod Ang Dungog Sa Imong Mga Anak Gibaligya sa Mga Hanggaw.

III

Milyon Milyon Sa Imong Anak Nanagpuyo Sa Ilalom Sa Tulay,

Nanghigda Sa Mga Aseras Ang Mga Bolingot Nga Nagkagidlay,

Nangatulog Ang Mga Makalilimos Nga Pan-os Ug Bukog Ang Panihapon,

Mga Bausra Ang Panginabuhi Sa Mga Lumad Nga Tabunon,

Mga Batang Inosente Namaligya Ug Bulak Nga Mga Larag ug Hapay,

Mga Babayeng Niwangon, Namaligyag Kinakawat Kawat Nga Kalipay,

IV

Unsa Namay Gidangatan Ning Kanhi Perlas Sa Silanganan,

Nganong Nagkabulag Ang Mga Anak Sa Ilang Amahan Ug Inahan,

Ang Mga Tatay Nagpa ka Ulipon Sa Mga Arabo Sa Mainit Nga Gingharian,

Ang Mga Nanay Nag Pa Mutsatsa Sa Mga Amo Nga Daugdaugan,

Ang Mga Anak Namaligya Ug Druga Sa Mga Ngitngit Nga Agianan,

Mao Kini Ang Giingon Ni Rizal Nga Paglaum Sa Yutang Natawhan,

V

Nasod Ko Nganong Gipasagdan Mo Ang Imong Kaugalingon,

Nganong Miampo Ka Sa Mga Salbahes Nga Tigpaka-aron Ingnon,

Nganong Nag Paanod Ka Sa Mga Sala' Ug Hilas Nga Kahilayan,

Nganong Nag Paulipon Ka Sa Mga Laog, Luog Nga Adunahan,

Nasod Ko, Gipasagdan Mong Mapusgay Ang Dungog Sa Atong Kaliwat,

Nganong Gitugotan Mong Yatakan Ang Dgnidad Nga Ilang Gikawat?????

Ngano, Ngano, Ngano........Wala Ako Makasabot.......

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)