Kaban ni Atty. J. B. Jimenez: ANG TAWHANONG HUSTISYA. . .

ANG TAWHANON'G HUSTISYA. . .

Kon Usa Ka Ka Kabus Nga Manananggot,

Bilanggo-on Ka Ug Makapunit Ka Ug Hungot,

Apan Kon Si Napoles Ka Bilyones Kono Ang Gikurakot,

Bisa'g Mga Dagkong Politiko Mohalok Sa Imong Lobot....

ii

Ang Hustisya Nga Tawhanon,

Sa Balay Sa Tambayawan Maingon Ingon,

Kon Moagi Ang Mga Langaw Mosangit Lamang Intawon,

Apan Kon Mga Agila, Mga Uwak, Molahos Lahos Lahos Dayon....

iii

Kon Usa Ka Lamang Ka Iskwater Nga Kabus,

Ug Makasala Ug Gamay, Sa Prisohan Ka Lahus,

Apan Kon Si Napoles Ka Nga Ang Dala Bilyones Halus,

Bisag Mga Taas Ug Katungdanan, Moluhod Mora'g Busabus.

iv

Kon Usa Ka Senador Nga Halangdon,

Milyones Ang Bonus, Regalo Kay Talahuron,

Apan Ang Mga Milyones Nga Kabus Walay Pagkaon,

Nagpuyo Sa Mga Barong Barong, Nag Ilaid Sa Kawad-on.

v

Kon Usa Ka Maligdong Kang Kongressman,

Milyones Ang Pork Barrel Sa Tuig Nga Tanan,

Wala Konoy Kurat, Ang Gipili Nga Iyang Pangalan,

Tulo Ka Bilyones Matod Sa COA Ang Sa Iya May Kalambigitan.

vi

Ang Tawhanon Nga Hustisya,

May Pinihig Ug May Mga Iya Iya,

Wala'y Katarungan Kon Walay Kwarta,

Ang Mga Sapi-an Lang ng May Demokrasya....

vii

Busa, Kitang Mga Mayokmok Sa Kalibotan,

Kanunay Lamang Nilang Paga Yatak Yatakan,

Apan Timan-i Nga Mo-abot Ang Adlaw Sa Kamatuoran,

Diin Moluhod Sa Yuta' Ang Mga Maot Niining Katilingban. . . .

viii

Mo-abot Ang Adlaw Sa Pag Panudya' Sa Masupilon,

Ug Sa Pag Tumba Na Gayod Sa Mga Mapahitas-on,

Hapit Na Mo Bidlisiw Ang Sidlak Sa Bag-ong Kabuntagon,

Kanus-a Mo Subang Na Unya, Ang Bag-ong Nasof Nga Pilipinhon . . . .

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)