Kaban ni Atty. J. B. Jimenez: B.....I.....N.....T.....A.....N.....A' . . . . .

B.....I.....N.....T.....A.....N.....A' . . . . . 

I

Bisan Baya' Ug Hinanali Lamang Ug Daklit,

Bisa'g Ang Pagyahat Ko Kinalit Kalit,

Nasud-ong Ko Ang Aping Sa Langit,

Nasil-ngan Ko Ang Ang Mga Bitoong Nasaling-it,

Didto Sa Sabakan Sa Mga Panganod Ug Ngilit,

Nakita Ko Ang Talisalop Nga Adlawng Nanamilit,

Nakita Ang Siga Sa Kilat Nga Midul-it,

Sa Utlanan Sa Kahayag Ug Kangitngit.

II

Bisan Sa Daklit Lamang Hikit-an,

Ang Mga Nagkadaiyang Kamatuoran,

Nga Nagpasundayag Sa Kahitas-an,

Bisan Sa Mga Dinali Daling Kahigayonan,

Himatud-an Ko Ang Kaanindot Sa Kinaiyahan,

Sa Bintana' Nga Maoy Telon Sa Kalibotan,

May Mga Mensahe Ang Labawng Gamhanan,

Alang Sa Tawong Masupilon Sa Tanan.

III

Bukas Ang Bintana' Diin Nagpadayag,

Ang Mga Gasang Katahom Ug Kaanyag,

Naga Hulat Ang Mga Bidlisw Sa Kahayag,

Mga Bintana Sa Palasyo Man O Sa Payag,

Kon Ang Kinabuhi Ta Hinikawan Man Sa Dan-ag,

Kita Ang Nagpaka-Buta Ug Nagpaka-Salaag,

Naga Hulat Ang Bintana Sa Iyang Mga Iwag,

Kon Wa Kita'y Nakita, Kita Ang Nanag Danghag.'

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)