Kaban ni D_BystandeR: MISIMANG SI MAYOR MIKE UG LAING AGIANAN

Sukwahi sa gisangyaw sa atong mahal nga Santo Papa Francis diin iyang gihangyo ang mga nagkalainlaing lider sa mga nasud sa tibuok kalibutan nga angayang tabangan ang mga kabus, dinhi sa ato si Mayor Mike Rama mao na hinuon ang nanghingusog nga kinahanglang papahawaon ang 80 ka pamilya nga anaa intawon nag-antus sa pagpuyo nga pinobre basta lang nga sila mabuhi sa trabaho nga tinarong ug wa moapil sa mga bisyo kanang ilang giingon nga "suyop-suyop" ug uban pang mga salawayon nga mga krimen. Apan ang atong "halangdong" Mayor Mike Rama, sa way pagtan-aw kon makatarunganon ba ang iyang gibuhat mipakanaug ug dinalian ug  kusganong mando nga silang tanan kinahanglang pugson sa pagpabalhin sulod sa 24-oras unya adto tapokon sulod sa Inayawan sports complex bisan pa ug way klaro ang plano kon asa niya ipahigayon ang maong mga  kabus nga mga pamilya. Kahinumdoman nga sukad pa sa tuig 1990 nga  nagpuyo na ang maong mga pamilya sa maong lugar ug karon sa kalit lang iyang gipugos sa pagpabalhin ug maayo ra ba kon duna siyay plano nga  maayo alang kanila kon dili aron lang iyang tugawon ug sa laing tinubdan sa balita papaulion kuno sa ilang tagsatagsa ka mga lugar diin sila magagikan. Apan 25 na ka tuig ang nakalabay ug lisud kaayong hunahunaon ang gibuhat ni Rama. Apan kini iyang gipaagi sa usa ka rason o katarungan nga para  kuno mahalikay sa disgrasya kay basin kuno ug matam-okan sila sa nagkadaghan nang liondok sa mga basura sa maong dapit. Apan sa kolum ni Leo Lastimosa nga bag-o pa lang nigawas gitaho ni Leo nga ang amigo diay ni Rama nga ginganlan ug Rustom Ignacio, nga kanhi Barangay Kapitan sa Inayawan, maoy gihatagan ni Rama ug ispesyal nga pabor aron masipong sa iyang amigo ang tanang matang nga masapian gumikan sa basura kay ang tanang mga basura gikan sa tanang mga barangay sa habagatang dapit sa syudad adto man ipondo sa pribadong yuta nga gipanag-iya ni Ignacio aron hagpaton hain ang ikabaligya pa ug dyutay na lang ang mahakot ngadto sa Consolacion nga maoy labayanan sa basura. Ang kooperatiba sa mga manguykuyay ug basura sa Inayawan matud pang Leo Lastimosa maoy unang nakulban sa kaldero kay di na man sila maka-intra pa sa maong negosyo kay anaa na man sulod sa pribadong luna ni Ignacio.

Footnote: This comment came out in connection with a news item in Banat News, entitled, "80 ka pamilya sa dumpsite namahawa na." It came out on 04/16/15