TIK, TAK, TIK, TAK

Tik, tak, tik, tak...

ang taknaan nagpangatagak,

may mga saad nga namulak,

may nabahaw ug napan-os,

 mga pasalig nga napaltos,

 luyahong minuto ug segundo,

miagunto, gikusokuso,

tuig 2013 nagkaawop na,

nagkalanay sa atong mata,

tuig sa serpente namilinbilin,

 gidulaan ta sa tay-og ug hangin,

kagubot sa mindanao,

panurikbot sa kaban sa mga tawo

tik, tak, tik, tak...

nagkabayo ang 2014,

untol-untol ang iyang katulin,

 bag-ong  panaad gipangladlad,  

sa kasingkasing gibukhad,

pagkamabinantayon hingosgan,

 pakiglambigit sa kinabag-an,

paghinultol sa buluhaton,

kakugi, kahibalo'g kamadasigön,

 itanom, atong  bugtawön.

tik,tak, tik, tak...

sa atong kamot,

sa atong paningkamot,

mautingkay ang nagpaabot,

sa atong pagbuot,

mahimong maharuhay ug maalimuot,

ang gipangandaman, ang  umaabot,

sa tuig 2014,

tubagon ta ang mga pangutanang nagpaabot...

tik, tak, tik,tak...