i
Daghang Salamat sa Gasa
Mo Nga Kinabuhi,
Nga Gisalig mo Ning Kabus Sa Walay Pagmakuli,
Salamat Bisan Pa Ug Ang Tumong Ko Nagkalahi,
Bisan Pa'g Giuhaw Sa Gugma, Nagpabiling Pa Dili Dili.
ii
Daghan Salamat Sa Gi Mugna' Mo Nga Kalibotan,
Sa Imong Mong Kalipay Nga Gisuklian Ko'g Pagbangotan,
Daghang Salamat Sa Imong Mga Mugnang Kinaiyahan,
Nga Sa Hinay Hinay,Ako Pang Gi-Among Amongan.
iii
Salamat Sa Tubig Mong Bugnaw, Sa Yuta Ug Hangin,
Nga Gitanyag Mo Kanamong Nahikalimot Sa Panalangin,
Salamat Sa Mga Bituon Ug Adlaw Nga Paglaum Ang Gihambin,
Salamat Kay Bisan pa Sa Ka Dulom, Kahayag Ang Nagalimin.
iv
Salamat sa Musika, Sa Mga Saloma Ug Awit,
Salamat Sa Mga Garay, Mga Balak sa Pag Sangpit,
Bisan Pag Nia Sa Langob, Makahangad Gihapon Sa Langit,
Salamat Kay ang Pangaliyupo' Sa Kapakyas Wala Masangit.
v
Salamat Sa Mga Alibangbang Ug Sa Mga Bulak,
Adunay kasumbongan Human sa Bakho Ug Hilak,
Salamat Sa Mga Kahoy Bisan Pag Gipukan Ug Na Hunlak,
Salamat sa Dahong Laya' Kay Malaumon Human Mapulak.
vi
Salamat Sa Mga Suliran Nga Gitamparos Mo Sa Kapalaran,
Aron Lig-onon Ang Kasingkasing Ug Tudloan Ang Dughan,
Salamat Sa Mga Luha' Bisan Pag Mga Mata Naughan,
Kay Gibanlas Man Sa Dayon Ang Tanang Kagul-anan.
vii
Salamat Sa Among Banay, Bisag Sa Inanay Nagun-ob,
Salamat Nga Bisan Mabangis Ang Palad, Adunay Pagpa-ilob
Salamat Kay Bisan Pagkapila Mapakyas, Magpadayon Pag Usob,
Salamat Nga Kanunay Nga Mobarog, Bisag Kapila Na Makulob.
viii
Salamat, Amahan, Nga Maantigo Pa Kaming Magpasalamat,
Bisag Gilumsan sa Kasakit Ug Ang Kahiamgo Mora Ug Gilamat,
Salamat Kay Makamao Pa Kaming Mo-ampo' Aron Kanimo Isang-at,
Ang Tanan Namong Mga Pagbati, Nga sa Pulong Dili Sarang Ika-bungat.
SA L A M A T. . . . .S A L A M A T. . . .A M A H A N. . . .S A L A M A T ..
(Bug-os ang pasalamat sa KAHAYAG ngadto sa nagsulat sa garay nga si ATTY. JOSEPHUS B. JIMENEZ. Usa siya ka kanhi Department of Labor and Employment (DOLE) Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN, kanhi Labor Attache ngadto sa mga nasod sa Malaysia, Kuwait ug Taiwan, magsusulat sa nagkadaiyang libro sa mga nagtuon sa kurso pagka abogado. Nagikan siya sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK kon LUNSAY NGA AMBAHAN SA MGA BISAYA SA FACEBOOK)
|
Comments