Kaban ni Atty. J. B. Jimenez: P..A..M..A..S..I..N..B..A..S..I..N... . . .P..A..M..A..S..O..N..B..A..S..O..N. . .

i

Bason Pa Diay'g Malooy Ang Kahitas-an,

Nga Mogaan Gaan Ang Atong Gipas-an,

Basin Pa Intawo'g Itugot Sa Langit,

Nga Ang Mga Pangaliyupo' Nato Dili Masangit,

Bason Pa Unta' Diay Ug Sa Kapulihay,

Sa Kapit-os Kita Maka Lihay Lihay.

ii

Bason Pa'g Mobali Ang Tuyok Sa Panahon,

Nga Makalingkawas Kita Sa Daw Kwadradong Kahon,

Pila'y Palad Kon Mobalit-ad Ang Ligid Sa Kapalaran,

Ina'y Kita ang Magahalad' Kita Na Unya'y Paga Halaran,

Dili Nato' Matag-an Ang Padulngan Sa Hangin,

Kon Madala Diay Sa Tim-os Nga Panalangin.

iii

Nagbukal Nga Pagsalig, Dili Mabugnaw Sa Bugal Bugal,

Bisag Walay Puhunan, Nagpatuga tuga Sa Sugal Sugal,

Motari',Mo-antog, Namasin Ug Makaswerte, Hari-an,

Mopusta Sa Inilog Bisag Ang Biya' Ra Ang Gitarian.

Molugos Ug Casino Ug Lotto, Bisa'g Puhonan Nihit,

Inig Ka parot Halos Ang Kaonon Sa Basura Pinunit.

iv

Kay Lagi, Usa  Ka Sugal Ang Matag Labok Sa Kinabuhi,

Labaw ang Kapildihan Kay Ang Palad Daw Naga Budhi,

Daghang Surambaw Nga Bunga Sa Mga Tanghaga' Ug Lingla,

Sugal Nga Way Laing Sangko-an Kon Di Pagbasol Ug Katingala.

Apan Sa Walay Hunong, Naga Padayon Sa Pamasin Basin,

Sugal Bisag Pauli Sa Pag Tuslob Ug Asin.,

v

Pamasin Basin Nga Maka Tayming Sa Dyakpat,

Bugtaw Sa Salamangka Nga Abtik Sa Lipat Lipat.

Dali Rang Mag Pa-ulog Ulog Sa Mga Pyramid Scam,

Kay Lagi Gidaman Sa Dakong Kwarta Nga Makamkam

Modangat Ang De Malas, Hurot Ang Mga Salaping Inutang,

Naliso-an Sa Twerka Mora Na Lag Kalag Nga Nag Lutang Lutang.

vi

Sa Matag Antog Sa Antugon Sa Bato Nga Antogan,

Gitahan Ang Dignidad, Kaligdong Ug Ka Bantugan,

Nagpadayon Sa Pamasin Basin Nga Unta Kaloy-an, Modaog,

Unya Diay Maparot Lamang Tungod Sa Kadalo' Ug Kalaog,

Dili Makontento Sa Gamay Nga Grasyang Gigasa,

Pulos Pagpahimulos, Dili Motoo Sa Gahom Sa Puasa.

vii

Sa Matag Tuyok Sa Ligid Sa Kapalarang Mahikawon,

Nagyampungad Ang Mga Sugarol, Halos Di Na Matulog Intawon,

Nagpaabot Sa Pag Bundak Sa Manna Gikan Sa Gilaumang Langit,

NagDuhiraw Nga NagLakaw Taliwala sa Nag Logitom Nga Ngitngit,

Pamasin Basin kay Naga Salig Sa Swerte Sa Lakaw sa Kinabuhi,

Wala Magdahom Nga ang Mogangat Mga Malas Nga Nangasuhi'.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)