Kaban ni Atty. J. B. Jimenez: HUNGHONG UG HAPUHAP

                                                                                                          

HUNGHONG UG HAPUHAP

Makapanlimbawot Ang Kahilom,

Niiinng Bugnawng Nga Kilomkilom,

Dinhi Ning Mamingaw Nga Lapyahan,

Niining Lagkaw Nga Biniyaan,

Apan May Gihunghong Ang Mga Huyohoy,

Dalang Hapuhap Sa Mga Kabus Nga Kahoy,

Mga Hunghong Sa Gasa Nga Paglaum,

Agig Hapuhap Sa Tali-abot Nga Dulom.

Nanuhot Suhot Ang Mga Hapuhap,

Samtang Ang Mga Balas Gipanag Ihap,

Mitidlom Sa Kasing Kasing Ang Hunghong,

Bisan Pa'g Ako Sa Kamingaw Nanglipaghong . . .

Gigakos ko Ang Matag Huyohoy Bisag Tugnaw,

Gipamati Ko Ang Hunghong Sa Luhang Milugmaw,

Buot Kong Kuptan, Gaposon ang Mga Kamot Sa Kahilom,

Buot Kong Gakson, Halogon Bisan ang Bugnaw Nga Kilomkilom.

Maayo Na Lamang Nga Tiwala Sa Kangitngit,

May Hunghong Ug Hapuhap Diin Ang Kamingaw Ika Saling-it..

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)