Kaban ni Atty. J. B. Jimenez: L..........U..........M..........A..........Y. . .
i
Sa Imong Kaanyag, Daw Napukaw,
Ang Nahinanok Kong Kahiamgo Nga Bakikaw,
Sa Imong Katahom, Sa Tibuok Gabii Ako Nagtukaw,
Sa Kahumot Sa Imong Alimyon, Bisag Layo' Akong Gi Lakaw,
Gilumay Mo Diay Ang Pag Bati Ko’ng Karon Lang Mituyhakaw.
Kanunay Na lamang akong Nag Hinoktok Ug Naga Tuaw.
ii
Sa Imong kamadanihon, dili na ako makatulog,
Gi-abot ako ug dako’ng salimuang ug kalibog,
Ang akong Kabubut-on Hilabihan Nga Nahulog,
Kining Gugma Ko Ug Kaibog Kanunay Nga Nag Sulog Sulog,
Kining Habol Na Lamang Ug Unlan ang Akong Gihalog
Samtang Dili Mahimutang Nag Bulo-Balintong Sa Salog.
iii
Gidani Ug Gibihag ang Tibuok Kong Kabubut-on,
Gilumay Mo Ang Akong Gugma Ug Dili Na Mahimong Langkaton,
Bisan Pa Gani Ug Unsay Akong Paga-Buhaton,
Ikaw Ug Ikaw Lamang Ang Akong Paga Handomon,
Ang Ngabil Nga Daw Nagtabisay Sa Pagka-Malamaton,
Ang Lilok Sa Lawas Mong Pag Kalisod Nga Gakson.
iv
Dili Ug Dili Mataligam-an ang Imong Matang Matahom,
Nga Naga Hatod kanako Ug Buhi’ng Paglaum,
Ang Nagdunghay Mo’ng Buhok Nga Daw KilomKilom,
Maoy Naka Dan-ag sa Akong Dalan Nga Dulom,
Gilamat Mo Kining KasingKasing ko Ug Pag Dahom,
Binilanggo Mo Na Sa Dayon, Ang Tawhanon Kong Panghukom.....
(Bug-os ang
pasalamat sa KAHAYAG ngadto sa nagsulat sa garay
nga si ATTY. JOSEPHUS B.
JIMENEZ. Usa siya ka kanhi Department
of Labor and Employment (DOLE) Undersecretary, kanhi Vice President, PEPSI
COLA PHILIPPINES, kanhi Director for Labor Relations, SAN MIGUEL CORP., kanhi
Personnel Director, PETRON ug PNOC, magtutudlo sa kurso sa abogasya sa mga
dagkong tunghaan sa Manila sama sa UST, FEU, UE, SAN SEBASTIAN, kanhi Labor Attache ngadto sa mga nasod sa
Malaysia, Kuwait ug Taiwan, magsusulat
sa nagkadaiyang libro sa mga nagtuon sa kurso pagka abogado. Nagikan siya sa pamilya nga taga Ronda, Dumanjug ug Argao
sa lalawigan sa Sugbo. Malamposon kaayo siya sa pagkab-ot sa iyang damgo ug
tinguha, ug karon magtampohan sa peryodikong The Freeman isip magsusulat ug
artikulo matag semana. Siya ang tigtukod sa grupo sa mga magsusulat nga
magtatampo sa grupong LAB-OK kon LUNSAY NGA AMBAHAN SA MGA BISAYA SA FACEBOOK)
Comments