Kaban ni Atty. J. B. Jimenez: NAGLAGITING ANG INIT SA ABRIL .. . . .

NAGLAGITING ANG INIT SA ABRIL . . . . 

Daw makapaso' ang init nga Naglagiting,
Gani Makalaya  Sa mga Bulak Ug Salingsing,
Samtang Nagbukal Ang Dugo' Sa KasingKasing,
Sa Kasilag, Pagdumot Niing Gugmang Nagkamoritsing.

Kauhaw Sa Naughang Mga Pagbati,
Mga Gala, Sa Sangang Sa Init Nanagalugti',
Dalogdog, Linog, Sa Naglagiting Nga Kilat Ug Liti'
Panimalos Maoy Tukmang Ganti Sa Pagbudhi, Maoy Bugti',

Nag Lagiting Ang Kainit Sa Abril Ning Gibudhian,
Nag-alintabong Kayugot Ning Gitamparos Sa Kapakyasan,
Naga Bukal Ang Dugo' Panimalos Sa Gihigugmang Karon Gikasilagan,
Nag Lagiting Ang Kalagot, Nag alintabo Ang Kasing Kasing Nga Gidagmalan.

Nalawos Na Ang Mga Pongpong Sa Rosas Nga Gihalad,
Nahutdan Na sa Kahumot Ang Gugmang Napan-os Sa Saad,
Nalaya' Na Sa Dayon ang Mga Bulak Nga Miturok Sa Mga Ilad,
Nagum-os,Nahanaw' Na Lang Ang Bio-os Nga Wala Gani Makabukhad.

Pagka Bangis Sa Kainit Ning Abril Nga Mabudhi-on,
Walay Puangod Sa Gugmang Unta Lunsay Ug Malaumon,
Gipatay sa Nag Lagiting Nga Kasilag Ang Maaghop Ug Maunongon,
Nahimo Intawong Mga Laya Nga Bulak Nga Gipatong Sa Nailo Nga Lungon.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)


Comments

Popular Posts