Kaban ni Mario Vincenzo Menchavez Mandal: KARITON

KARITON 

Pasayloa kung nakasamok sa dalan

Nangita lang og kabalhinan,

Wala'y nagpabili'ng silingan

Kay wala'y pirme'ng pinuy-anan.

Magpadaplin lang ko'g maayo

Aron dili makalangan ninyo,

Dala'ng binuhat sa gobyerno

Para lang sa inyo'ng mga awto.

Labihan gyu'ng hinaya

Kay nangapaslot na ang lapalapa,

Ligid nga ginama sa tabla

Nahubsan na sa grasa.

Usa ra kakamot ang giduot

Ang usa nagkupot sa purol nga dunot,

Nabalaka ug nanghinaut

Nga dili makita ang samput.

Naa'y punuan sa kahoy sa unahan,

Duol sa basurahan apan layo sa puy-anan

Sa mga tinahod ug adunahan,

Mao'y ako'ng pahulayan ug kan-an.

(Bug-os ang pasalamat sa KAHAYAG ngadto sa nagsulat sa garay nga si  Mario Vincenzo Menchavez Mandal, usa sa mga binuhat nga naghupot ug bulawanong pluma sa panulat sa pinulongang binisaya).