Kaban ni Atty. J. B. Jimenez: KAHAYAG . . . .IKAW ANG GASA SA MGA MAGTUTUDLO'

Kamo ang mga lampara sa tiwala sa dulom,
Naghatag ug gamayng kahayag sa ilalom,
Ning mangiob nga kalibotang wala unta'y paglaom,
Kamo ang sulo' nga naga iway sa mga salumsom,
Kamo ang naghatag ug dan-ag sa dalang naglugitom,
Sa mga hagit ug sulirang ubos sa langit sa mga dag-om.

Mga Magtutdlo nga Dugay Nang Hinkawan,
Sa Tukmang Pag-ila Sa Inyong Pagtukaw` Sa Kabataan,
Dugay Nang Gisalikway Sa Usa Ka Way Pagpakabang Katilingban,
Apan Naga Padayon Sa Pag Alagad, Nga Kaugalingon Kinalimtan,
Mga Magtutudlo Nga Dalayegon Sa Kakugi Ug Kabuotan,
Ang KasingKasing Ug Tanlag Nga Bililhon Pa Sa Bulawan.

Nasaksihan Ko Ang Pag Alagad Ninyong Makanunayon,
Bisag Mo-ulan, Mobagyo, Molinog Kamo Naga Padayon,
Walay Pagpanuko, Ni Kahadlok, Kamo Labing Maalagaron,
Bisag Nagkalisod Lisod Sa Kinabuhing Pait, Sa Tanang Panahon,
Walay Paglubagd Ang Gugma Ninyo Ning Nasod Nga Tabunon,
Mga Bayani Kamong Walay Estatua Apan Lig-on, Halangdon.

Karong Mga Tigulang Na Kamo Ug Luya Na Ang Kalawasan,
Nakita Ko Sa Inyong Dagway Ang Kalipay Nga Hilabihan,
Kalipay Nga Nanag-sud-ong Sa Mga Bunga Sa Inyong Hinaguan,
Mga Malampuson Ug Mabungahon Ninyong Kanhi Mga Tinun-an,
Mga Haligi Na Ug Paglaom sa Atong Katlingban,
Mga Magtutudlo, Saludo ako Kaninyo Mga Bayaning Nahikalimtan.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)