LAWAS UG KATARUNGAN ANG PUHUNAN

Si Tokles ug Tekla

Pinaagi sa timailhan,  ikaw buligan, ikaw pasidan-an.  Maghatag kini   ug dan-ag sa agianan, kusog, kaisog ug kabantog.  Ikaw makigbatok  ug angkonon ang kadaugan kon mahuptan mo ang timailhan.

“Tokles,  naghukdong ka man gud. Unsa na? Hapit na ka sugta ni Tekla?”  pulong ni  Eking ngadto sa iyang higala.

“Wala pa gayud  Eking. Nagkadugay nagkahanap. Kagahapon lang, nagkadungan mi ug pamisita ni Berto Kabaw, pagkadagkoa baya sa iyang gidala’ng  balbakuwaonon. Gipalat-an dayon para kuno masuwa. Nagkaguliyang gud ang kusina.  Gawas pa ana, nagdala pa gyud siya ug bukayo para isagol sa pan samtang nagtimo-timo sila ni Tekla.” luyahon ang tingog ni Tokles.

Niadtong miaging semana, pagpamisita nako akong nakita nga nagliundok pud ang bandehadoan sa prutas sa ilang talad kan-anan. Unsaon si Tonying nga komprador ug prutas sa Carbon Mall man ang nakapahimutang. Basta tan-awon lagi nimo ang sulod sa balay, napuno sa hapag sa mga prutas gikan sa tunokong Durian, Tambis,  Guyabano,  Mansanas  ug  Mansanitas. Ang ginikanan ni Tekla nga nagdawat dagko kaayo’g ngisi.”

 “Yuna pa, unsaon man  nimo Tokles pagdani si Tekla taliwala sa dili kasarangan nimong mga kaparang sa gugma?”  sukot ni Eking.  

“Eking,   wala man tuod koy ikapalit ug daghang  pagkaon, prutas ug uban pang panghaylo sa mga ginikanan ni Tekla apan nagsalig ko sa akong kaugalingon, lawas ug katarungan ra ang akong puhunan.” tubag ni Tokles.     

“Yamat ra. Pasabot nimo imong hayloon si Tekla sa tigson nimong panglawas ug sa kamaayo nimong mangatarungan?”

 Wala pa katubag si Tokles sa pangutana, may tingog silang nabati nga mibuak sa  ilang panagtabi.   

“Maayo.. maayo… Tokles! Dia nako. Nakahukom nako. Palihug pasudla ko.”

 Mitambo sa bintana ang managhigalang Tokles ug Eking.  Dili sila makatuo sa ilang nakita.

“Te.. Tekla?” mikalit ug kuba ang dughan ni Tokles. Si Tekla ang iyang nakita.

 “Oo, ako kini Tokles dali pasudla nako.” mahinangpong pulong ni Tekla.

 Samtang nakapahimutang na silang duha si Tokles ug Tekla sa lingkoranan.  Nagkatapad.

“Tokles,  kamong tanan nakong maghahalad, akong gisaaran nga pilian mo nako. Ug ikaw ang akong napilian.”  ni Tekla.   

“Ti.. Ti.. Tinuod ka Tekla? Salamaat.” milugmaw ang usa ka lusok luha sa gingi sa mata ni Tokles. 

“Ikaw gyud Tokles, mura ka ug walay salig sa imong kaugalingon, inig atubang nato ilabi na kon magkadungan mo nila ni Berto Kabaw, Boy Pansit ug Tonying  Kumprador."

“Palihug pasabta ko. Wala koy kabutangan sa akong kalipay Tekla.” dili makasabot si Tokles sa iyang gibati. Daw gibayaw siya sa ikapitong langit. 

“Sus, dili ko mamili nila oy. Mga tigulang silang tanan. Si Berto Kabaw  wala gani makapabulit sa iyang pangag, Si Boy Pansit gahibat lang ang panan-aw ug si Tonying Kumprador  kanunay lang gasiga ang mata.  Linghod pa kaayo akong pangedaron nga padulong pa sa bayente. Walay  makapareha nato nga klasmeyt unya ikaw pud ang akong sandiganan sa akong pagtuon. Ikaw ang nag-una sa atong klase, ug ikaw pud ang tighatag nako ug kadasig sa panahon nga makasab-an ko sa akong ginikanan kon dili  ko makaatubang ug tarong sa akong mga tigulang nga magdadayeg.  Anaa kanimo ang hiyas sa tinuod nga tawo. Bisan sa inyong kalisod ug pagkabutang. Imong gipadayon ang imong pagtungha.  Wala kay kukahadlok nga miasdang ug nakigbatok ka sa mga pagsulay sa kinabuhi. Nakita nako kanimo ang mga timailhan sa maayong ugma Tokles.”

Wala makapugong,  nagkagaksanay sila si Tokles ug Tekla. Sa katapusan gituhop ang tagsa-tagsa nila ka kasingkasing sa kalipay.  (KATAPOSAN).

(Napatik sa Banat News kining maong sugilagming kaniadtong Enero 14, 2013, Kalingawan Section.)