Kaban ni D_BystandeR: SINUKLIAY SA HUNAHUNA

Ondo:

Dear Teofy & Babie, Nalipay ko sa "interaction" nga namugna niining panahon sa pasko. Ug wa ko masayop, si Cynthia mao ang kanhi nagtrabaho sa usa ka kompaniya nga dinha mahimutang sa Sanciangko iskina Jones Avenue kay adto ko niya magpakopyahan kanang gusto kong magpa-xerox kaniadto sa diha pa ko sa ato. Ug kanunay ko niyang mangumusta kaniadto sa iyang mga igsoon lakip na si anhing Bebe nga maoy kinamaguwangan o si Claro ba maoy kinamaguwangan? Ug si Cletus, bisan wa kaayo ko makahinumdom sa iyang nawong apan di ko malimot sa gisulti kaniadto ni Inday Edith nako nga si Cletus kuno maoy nag-abaga sa iyang gastohanan sa ospital sa dihang nasakit siya. Ug si  Noy Tasio, nga bana ni 'Day Edith mitaliwan na sab diay? Ug makalugar unya ka palihug ug bawos kon unsa nay lakaw sa kinabuhi nila ni Impyong ug Lilay kay mora ra ba to ug dunay gipamatyag si Impyong sa iyang panglawas kaniadto. Sila si Fe ug Flora, kumusta na man? Ug sila si  Tiyo Ondo Bagano ug iyang anak nga mora to ug Arturo ang pangan. Ug si Eber nga manghud ni anhing Pros kumusta na man sab. Pirmi to siyang makit-an nako nga maoy mo-escort ni anhing Mama Meming inig-agi nila sa balay nilang anhing Manoy Esper sa Lopez Jaena gikan sa inyong bay sa Calero kanang moadto na sila sa inyong bukid diha sa ibabaw sa Talamban, nakalimot na ko sa ngan sa lugar tungod sa kadugay na. Apan wa kong kalimot sa ngan sa inyong iro kaniadto nga ginganlan ug "Ahos." Ug di kong kalimot nga ang una nakong pagtan-aw ug sine diha sa syudad sa nag-edad pa ko ug nuybe kadtong imo kong giagda nga manan-aw ta ug sine sa "Star Theater" nga ang nagdala niadto si anhing Burt Lancaster. Nakahinumdom ko nila kay kaniadto kanang mapasko sila si Mama Paz ug Papa Basyo anha man mamasko sa syudad sa Sugbo ug mo-istar sa inyong balay sa Calero kay sila ra mang duha si Mama Paz ug Mama Meming maoy suod kaayo nga manag-agaw (first degree cousin pa gyud!) sukad pa sa ilang pagkadalaga hangtud nga nangatiguwang na sila, ug ako ray ilang ikuyog mao nga  nasinati nako ang atong mga paryente sa side ni Mama Paz. Ug kadto si Papa Pinong kaniadto di kong kalimot kay kanang mamahaw na mi kaniadto kauban to namo siya sa talad kan-anan ug di kong kalimot sa mantekilya (star margarine) ug pandesal ug sikwate nga kanunay naa sa lamesa. It's nice to refresh my memory about those "little things" which up to now serves as a treasure to my memory especially that I am now in the twilight years of my lifetime in this world of the living. Kami diay, it's good to tell you about this, duna na mi bag-ong nahuman nga gipatukod nga "mausoleum" sa usa ka private cemetery sa lungsod sa Minglanilla nga nakagasto mi ug kapin sa "half a million pesos." The lot area is 5 meters x 6 meters.  Nagkasabut man gud mi si Inday Perla nga mas maayo nang duna mi gi-andam nga among  pahuwayanan nga mapuslan sab sa among mga anak sa umaabut. Ang ila na lang unyang "problema" mao ang "paghilak" kay ang pwesto anaa na man. Sorry to have made this a long story to tell apan wa koy paryente nga lain nga akong kasultihan ingon niini kay kita ra man say suod nga manag-agaw sahi sa ilang kasuod kaniadto ni Mama Paz ug Mama Meming. Lastly, regards to you and Babie, and to all the children around. - Ondo (Si Inday wa ron diri kay unya pa to siyang Jan. 6 mo-"day off." Si Inday nagsigi pa intawon ug trabaho kay madala pa man sa iyang edad nga 66. She turns 67 September 10 this year. Ang iyang trabaho nagbantay ug tiguwang sa usa ka retirement home, ug pinangga kaayo siya sa mga anak sa tiguwang kay maayo man si Inday nga mogam sa tiguwang. Her old lady will turn 90 years old this coming April, pareha mo ug birth month! Hehehe!) Mahitungod kang Teddy Decamotan ako unyang ipa-kontak sa telepono si Daisy, ang asawa ni Teddy aron makakuha ko ug bag-ong telephone number kay akong sultihan nga nangumusta ka niya. Ang iyang mga manghud kaniadto didto sa Aurora Zamboanga del Sur akong mga classmate sa High School sa Santa Teresita Academy maong alegre kaayo ang among panagkita kay nakakonectar ko niya sa iyang mga igsoon ug mahitungod usab sa inyong panagsuod tungod kay  niingon siya nako nga siya sab kuno maoy Presidente sa kapunongan sa LUDABI sa dakbayan sa Iligan.

Teofy:

Dear Ondo and Inday Perla,

Nalipay kaayo ako nga nakadawat sa imong tubag sa akong greetings kaninyo sa Bag-ong Tuig. Bisan tuod kanunay kong mabasa ang imong mga write-ups, apan lahi ra kini sa mensahe nga alang gayod kanimo. Ug nalipay usab ako nga nasayod nga nakontak, nahimamat, ug gikabalitaay mo si Teddy Decamotan usa ka suod nga higala nga didto magpuyo niadto sa Iligan City, Lanao del Norte. Usa si Teddy sa mga aktibo nga opisyal sa Ludabi-Iligan sa dihang napili ako nga pangulo sa kapunongan sa kombinsyon nga didto ipahigayon sa Iligan City. Ingkaso magkakontak kamo ni Teddy, personal man o sa telepono lamang, palihog ug saling-it sa akong pangomusta kaniya.

Do, komusta man ang inyong Pasko ug Bag-ong Tuig? Sa Pasko ang among gikauban ni Babie mao lang ang among mga anak ug mga apo. Sa Bag-ong Tuig, sigon sa naandan nangari usab ang akong mga pag-umangkon, sila si Claro, ang iyang anak nga si Ronnel nga miabot gikan sa Africa ang iyang asawa ug 4-ka-bulan nga anak. Diri sab si Cynthia ang manghod ni Claro ug upat ka mga anak. Si Cletus ang nahibilin sa ilang balay.  Nahimo na namo kining batasan/tradisyon nga magpundok mi matag Bag-ong Tuig. Diri sila maniudto ug namauli sila lapas na ang alas 7 sa gabii. Malipayon baya gihapon kami nga nagbalitaay sa panghitabo sa milabay nga tuig. Maora'g nahimo na namo kining routine ug gilantaw na namo kining mahitabo sa matag tuig. Kining nagkatiguwang na ta, mabaw na lang ang atong kalipay.

Hinaot nga one of these days makakita ug magkakauban na sab kita diri sa Sugbo. Dinhi na lang usa kutob ug Bulahang Bag-ong Tuig sa tanan.

Imong ig-agaw,

Teofy

Ondo:

Dear Teofy, duna na koy gi-andam nga phone card kay akong plano motawag ko nimo aron mo-"greet" ug Merry Christmas, unya kay wa kong kalugar tungod kay usahay ma-"busy" na man hinoon ko ug binasahay sa mga balitang lab-as sa internet unya magsuwat dayon ko aron akong ikapadala ni Dodong James para sa "kahayag" publication. I'm planning to call you either Saturday or Sunday evening kay nianang orasa naa na gyud ka sa balay gikan sa imong opisina. Ako nang gitawgan si Teddy Decamotan usa ka semana human ta magka-istorya mahitungod niya ug nalipay siya nga akong gisultihan nga suod kaayo mo sa akong ig-agaw nga si Teofy. Si Teddy sa akong tan-aw mora ug layo ra kaayo siya nimo sa akong tan-aw kay mora man ug wa ka matiguwang apan si Teddy tiguwang na man kaayo ug hitsura sa edad nga 73 (mao nay iyang edad kaniadtong last Christmas kay nagkita man mi sa Christmas Party sa opisina nilang Inday apan wa na kong kakita nila karong paskoha kay basin ug gikapoy na kay layo man kaayo ang ilang gipuy-an tua sa Wisconsin ba to ug di sa Indiana. Paminaw ko pareha mi si Teddy kay ingon si Inday Perla ako kuno tiguwang na sab ko tan-awon sa akong edad. Mora kuno ko ug tiguwang pa nimo tan-awon. Apan akong giingnan si Inday nga mora lang ni'g tiguwang tan-awon pero "paniti" di ba "anagon" pa. Unya iya sab kong tubagon, 'Unsa goy "paniti" nga wa na man gani kay "panuhod!'" Hehehe! Nabisto na hinuon ko! Apan sa dihang milabay ang pipila ka semana o bulan ba kadto, human nako maandam ang imong numero kay ako untang hatagan si Teddy aron magka-kontakay mo sa telepono, ang nahitabo mao nga di na nako siya makontak sa iyang telepono. Ug ang iyang asawa nga si Daisy nga taga Compostela, Cebu diha sa ato ug manghud ni Teddy ug napulo ka tuig, na-assign na sab ug laing lugar ug di na sila magkita si Inday Perla. Lastly, manghinaut na lang ko kaninyong tanan diha ug "Belated Merry Christmas and a Happy New Year!" Also send my regards to Tata and everybody in the house! - From Ondo & Inday Perla.

Teofy:

Dear Ondo, James and family:

Bulahan ug Mauswagong Bag-ong Tuig!!!. Usa kini ka nalangan nga panghinaot nga magpabilin ang inyong kakugi sa pagpanulat. Dili na magukod, bisan sa akong paghanduraw lamang, ang kakusog ug katulin sa inyong dagang. Nabiya-an na ako ninyo ug mga 100 ka milya sa inyong kakugihan. Hinaot nga anaa kamo kanunay sa maayo nga panglawas gawas sa grasya nga gihatag kaninyo sa labawng Makagagahom. 

James, daghang salamat sa Bisdak nga kanunay mong gipadala kanako.

Teofy

(Bug-os ang  pasalamat sa KAHAYAG ngadto sa magtatampo  nga si JOHNNY LOVE . Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCAÑO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 68,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata. Makadawat siya sa inyong mga hunahuna mahitungod sa iyang sinulat sa johnnylobedica@yahoo.com)