Kaban ni Mario: DAGITAB

DAGITAB

Sanag ang panimalay sud-ongon

Kon may suga'ng dagitabnon,

Apan tagbalay lisod pangitaon

Manago sa ngitngit kon paninglon.

Bayronon'g sa kabug-at makalisang

Gikargaha'g bisa'g unsa na lang,

Kon dili na g'yud matabang

Mas maayo pa'y ipaputol na lang.

Bulahan ang nanag-iya sa VECO

Samtang mga konsumedor nasikwate,

Hapit na usab gani maputo

Ang mga gagmay'ng negosyante.

Mga magbabalaod nga mat-an pas pinya

Padayon'g nagpakabungol ug nagpakabuta

Ni'ng mao'ng matang sa monopoliya

Nga nagtakoban'g kooperatiba.

Dili malisang sa mga reklamo

Kay ang DOE mismo ang abogado,

Naingo'g bibingka ang publiko

Sa baga nagluhod ug naglukdo.

(Mario Vincenzo Menchavez Mandal, usa sa mga binuhat nga naghupot ug bulawanong pluma sa panulat sa pinulongang binisaya.).