Kaban ni Estela: PAGPANGINLABOT O PAGPANGHILABOT

PAGPANGINLABOT O PAGPANGHILABOT

Murag susamang mga pulong apan daku ug kalainan

kon kini atong hubaron ug tagaan ug kahulugan.

Ang pagpanginlabot lahi kaysa pagpanghilabot,

tungod ky ang pagpanginlabot naghubit ug pagpakabana.

Samtang ang pagpanghilabot nagdala ug pagpanghimaraot.

Manginlabot kita sa nahitabo sa atong palibot,

Dili kay manghilabot kita sa uban ug dayon bagotbot.

Samtang atong kaugalingong tugkaran kita wa manginlabot.

Daku ug kaayohan ang dangatan kon kita manginlabot

alang sa maayong katuyuan.

Apan dakung gubot kon kita manghilabot sa kinabuhi

sa uban nga nawagtangan nag kabuot.

Dagan na lang daan ug asa ka makauliot,

kay siguradong lutuson kas nagpungasi nga kayugot

sa mga taw'ng imong gihilabtan kay wa mahimuot.

Busa higala, timbang timbanga,

hain niining duha ang makaayo ning katilingban ta.

Kay usahay raba malimtan nato nga lainlain

diay kining mga pulunga!

(Bug-os ang pasalamat sa KAHAYAG ngadto sa nagsulat sa garay nga si  Estela Parnoncellon-Jorza,  usa sa mga binuhat nga naghupot ug bulawanong pluma sa panulat sa pinulongang binisaya, kang kansang mga sinulat napatik  sa grupo Ludabi sa Facebook).