Kaban ni Richard: LIM-AW

LIM-AW

Usa ka gamay'ng linaw,

 nga mihulma sa yuta tang tabonon,

nga sa matag karon og unya gidaganasan,

 sa mga maidlot nga lusok sa ulan,

nga mugna sa kinaiyahan.

Matahom og maanindot sud-ongon,

 nga nahimong languyanan,

sa mga ngoyo-ngoyo og baki,

nga nanaghudyaka sa kamaya og kasadya,

taliwala sa mga batang sa kagabhion.

Pagkatulukibon sa kinabuhi,

 nga nahisama sa usa ka lim-aw,

 migimaw ang nagduhiraw'ng panumdoman,

diha sa tanaman sa mga damgo,

 nga gikulit sa tinagpis nga kapalaran.

Haaay.., mga panghupaw sa kalaay,

nga misakdap sa lapsaw'ng kadahonan,

 nga nangataltag gikan sa malig-ong pungango,

 aron motipon sa laray sa naagbon nga yuta,

 ning sikbit sa gamay'ng lim-aw,

nga mitomaw sa lagwerta, sa mga pangandoy.

(Bug-os ang pasalamat sa KAHAYAG ngadto sa nagsulat sa garay nga si  Richard “Ondo” Paghasian, nga nanimuyo sa Casuntingan, dakbayan sa Mandaue. Magsusulat siya ug magbabasa ug mga balak gani, nahimo na usab siyang kampeyon sa  lain-laing bangga sa balak nga iyang gisalmotan.)