Kaban ni Mario: BISAYA

Bisaya

Lumad nga San Remigiohanon,
Mais kanunay ang kinaon,
Sosama kang Lapu-lapu ang pamayhon
Sa kaliwat mapasigarbohon.

Mibuntog sa mga langyaw'ng malupigon
Apan tinuud nga maabiabihon,
Mihangop sa pagka Kristohanon
Ug gibunyagan sa langyaw'ng bansagon.

Nunut sa mga makinaadmanon
Pinulongan'g langyaw gigamit sa pagtoon,
Kay kuno sa kasamtangan'g panahon
Ang uban'g pulong lisud binisay-on.

Apan bisaya'ng dila ug kabubut-on
Nagpabilin'g bug-os nga Sugbuanon,
Dalisay nga Bisaya kon pasultion,
Lunsay'ng Binisaya gusto'ng palamboon.

(Bug-os ang pasalamat sa KAHAYAG ngadto sa nagsulat sa garay nga si  Mario Vincenzo Menchavez Mandal, usa sa mga binuhat nga naghupot ug bulawanong pluma sa panulat sa pinulongang binisaya.).

Comments

Popular Posts