Kaban ni Richard: HIGALA

HIGALA

Sa matag sobang sa adlaw,

sa sayo’ng kabuntagon,

maaninaw na usab ang talagsaong hagit sa kinabuhi,

 nga naghambin sa mga tigmo ug  tanghaga,

nga matukas lamang,

diha sa mahigalaong hiyas,

 diha sa banwa sa nag-aliwaros nga pangindahay.

Higala, ikaw ang bugtong kasandigan,

sa nagkaawop kong paglaom,

nga miaringkil diha nianang wanang sa mga paghandom, nga dugay nang nahunlak,

sa nagkadenang pagbati.

Oh, higala… ikaw ang tin-aw'ng langit

 sa maanyag nga bitoon,

nga maoy maghuhopay,

sa makislom kong kinabuhi,

diha sa nagtinandayay nga kagahapon.

Mga kabalaka ug kahadlok,

akong tukason tungod kanimo akong higala,

nga misagakay,

sa hinay og luyahon kong mga lakang,

nga nagsosapinday ning kiat tang kalibutan.

Bug-os ang pasalamat sa KAHAYAG ngadto sa nagsulat sa garay nga si  Richard “Ondo” Paghasian, nga nanimuyo sa Casuntingan, dakbayan sa Mandaue. Magsusulat siya ug magbabasa ug mga balak gani, nahimo na usab siyang kampeyon sa  lain-laing bangga sa balak nga iyang gisalmotan.)