HULAGWAY

Pagdibuho sa pamayhon ug panagway,

Talan-awon'g magkadugay walay pagkagaay,

Isulod kini sa kuwadro, talan-awon’g pawala sa kalaay…

Sa kamingawan, sa pag-inusara kini molutaw

Katam-is sa pahiyom, kini dali’ng mahanduraw

May hulagway’ng sa hunahuna mubathay makauhaw…

Kon sa panan-aw maayo, sagad ipakita ang hulagway,

Sa hulagway, ang nawong nga alimuot mohayahay,

Ang pislat patas-on, mga mata'ng sigahon ug dakoon. . .

Himoong gamay daw mangidhat tan-awon,

Bugason, lubyokon nga nawong, mga libaongon,

Patagon, sa hulagway kining tanan tarongon…

Kon si Dodong ug Inday ang magharong,

Mangandam, sa hulagway sila magpakaaron-ingnon,

Sa kahigwaos, ang itomon himoong pution…

Ang mga ubanon, magpatina, magpaitom,

Sa panagkita, ilang sutaon ang kamatinud-anon,

Sila mahingangha, sa wala dahoma’ng talan-awon…

dili makatuo sa makit-an, sila makalitan,

Si Dodong diay itomon, daw aliwas nga binuhian,

Samtang si Inday daw ungo nga nahayagan…

Pastilan, dili ka makasiguro sa hulagway

Mas maayo gyud ning maniguro aron dili magmahay

Sa tinutokay, sutaa ang nagpaluyo sa hulagway…

KAHAYAG