Kaban ni Atty. J. B. Jimenez: NASOD NGA NAGTAKUBAN..

NASOD NGA NAGTAKUBAN..

Nasod Sa Mga Luog Ug Laog,

Nagpaka dato' Sa Limbong Ug Ulog Ulog,

Nasod Nga Nahitumpawak Sa Walog,

Kay Sa Mga Bakak Migakos Ug Mihalog,

Nasod Sa Mga Tigpaka- Aron Ingnon,

Nga Malinis Apan Dia Bulingon,

Mga Lider Nga Nagpaila Nga Higala,

Mao Diay Ang Moluba' Ug Mopasipala,

Nasod Nga Daghan Ang Mga Langyaw,

Mangita Ug Sex Ug Lingawlingaw,

Nagbaha Ang Kuwarta Sa Mga Kasino,

Apan Gipangkuraw Ang Mga Anino,

Nasod Nga Puno Sa Mga Golf Ug Subdivision,

Gi-alirongan Sa Mga Squatters Nga Na Kunsomisyon,

Daghang Tubig Sa Mga Golf Ug Resorts Nga Dinato'

Ang Mga Tawo Sa Kanal Magkalos Aron Isabaw Sa Pagluto'

Daghang Mga Hotel, Too Ug Wala, Ug Deretso,

Mga Timawa Dili Dawaton sa Mga Hospital Kay Way Ikagasto,

Naunsa Na Kining Nasod Ni Sisa, Crispin Ug Basilio,

Nganong Ang Nagahari Si Kapitan Tiago Gihapon Ug Si Damaso?

Asa Na Paingon Ang Mga Mayokmok,

Mamahaw Na Lamang Ug Sinugbang Lamok?

Nasod Nga Linupigan?

Mosukol Ka Ba O Modagan ?

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)