Kaban ni Atty. J. B. Jimenez: HAGAWHAW

 

 

H.......A.......G.......A.......W.......H.......A........W.........

 

 May Gi Hunghong Ang Mga Huyohoy,

 Sa Salingsing Sa Usa Ka Kabus Nga Kahoy,

 May Mga Hagawhaw Ang Bugnawong Hangin,

 Nga May Giyamyam Nga Mga Panalangin,

 Adunay Mga Pulong Nga Hinay Nga Gilitok,

 Sa Kahilom Nga Kanhi Kagahob Ug Mibalitok.

 May Mga Tinaguan Ang Nag Inusarang Kahilom,

 Nga Sa Matag Handumanang Pait Gipugos Pagluom,

 May Mga Gitangag Nga Tanghaga' Ang Matag Gutlo',

 Kon Diin Ang Mga Handumanan Inanay Nga Makutlo'. . . .

 

 Ibutyag Na Lang Unya' Sa Matag Pakli Sa Panid,

 Kon Diin May Mga Karaang Kaban Nga Wa Pay Naka Paniid,

 Ukban Nalang Unya Ang Mga Gi-agop-opan Nga Mga Kabilin,

 Sa Tinakpang Lawak ' Nga Binayaan Sa Panahon Nga Matulin,

 Paniiron Na Lamang Kadtong Tinabonang Mga Bahandi,

 Ug Sa Mga Panumpa' Kon Diin Hinayhinay Nga Itandi,

 Paminawon Na Lamang Ang Matag Hagtok Sa Taknaan,

 Ug Dunggon Ang Mga Hagawhaw Nga Hagbay Pang Gitipigan,

 Maningod Na Lamang Sa... Hunghong Nga Nasaling-it Sa Mga Kahoy,

 Ug Tukion Ang Matag Pulong Nga Gilitok Sa Mga Huohoy....

 

 

 

 

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)