Kaban ni Atty. J. B. Jimenez: KANUNAY, NAKITA KO IKAW. . . . . .

KANUNAY, NAKITA KO IKAW. . . . . .

I

Sa Pag Silang Pa Lang Sa Banagbanag,

Sa Pag Konsad Sa Kahayag,

Sa Hinuyohoy Sa Sayong Buntag,

Sa Unang Pagtumaw Sa Kasanag,

Nakita Ko Ikaw. . . .

II

Sa Kinanaas Sa Gamayng Kawasan,

Sa Kabugnaw Gikan Sa Kasapaan,

Sa Kiay Kiay Sa Kadahonan,

Sa Kamingaw Sa Kalasangan,

Nakita Ko Ikaw . . . .

III

Sa Mga Bulak Sa Harden Nga Mahumot,

Sa Kalunhaw Sa Mga Tanom Makapahimuot,

Sa Mga Handomanan Nga Way Mahikalimot,

Sa Mga Katahom Nga Sa Kadugaan Misamot,

Nakita Ko Ikaw. . . . .

IV

Sa Mga Nota Sa Mananoy Nga Saloma,

Nga Sa Panahon Kununay Nga Gi-amoma,

Sa Kahugot Sa Matag Panagsama,

Sa Gugma Nga Walay Sama,

Nakita Ko Ikaw....

V

Nakita Ko Ikaw Sa Hulagway Sa Matag Binuhat,

Sa Matag Balak Nga Gitagik Ug Gisulat,

Sa Matag Damgo Nga Gituman Sa Buhat,

Sa Matag Kalipay Nga Gipangandoy Ug Gihulat,

Ikaw Ang NaKita Ko....Dios Ko, Amahan Ko.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)