Kaban ni D_BystandeR: HUNGAW ANG PANAN-AW NI BOBBY???

Dugay ra kong naghuwat nga mohisgot si Bobby Nalzaro mahitungod sa mga pamilya nga gipangkolban ug kaldero ni Mike Rama dinha sa city hall. Apan namuti na lang akong mata ug hinuwat nga mohisgot siya sa mga casual nga gipamatiran ni Mike Rama sa trabaho apan wa gyud maghisgot si Bob.

Ang iyang gibalikbalik nga paminaw ko morag plakang boak mao ang pagsigi niya ug pangita ug bikil sa Kapitolyo ug di ba ang pagsigi niya ug paghot sa mga BOPK councilors kay ang iyang gusto nga wa nay makapugong ni Mike Rama unsaon pagwaldas ang kwarta sa lungsod. Karon nanaway siya ni Ethel Natera, ang PIO sa Kapitolyo apan siya wa mahibawo nga ang papel ni Ethel Natera pareha ra sa papel nga iyang gidala. Apan mas ngilngig ning iyang assignment kay bisag asa siya motakilid, di makapahuway si Tommy O sa iyang "kahilabtanon" kay motira siya sa Kapitolyo ug City Hall. Pait kaayo ang pagka-butang sa BOPK councilors kay daw sa iyang gihulagway nga pulos mga "way buot" kay iyang gipakisama ug mga "robot" ang BOPK nga si Tommy ra maoy magbuot kon  unsay imandar. Unya si Gov. Jun iya na sang gisugdan sa iyang "tirada" nga he is operating like Pres. Noynoy who surrounds himself with "KKKs." Pagkatoytoy niining tawhana!

Maayo pa nimo mogawas na lang ka diha sa imong pwesto nga "Sunstar columnist" unya mangayo ka ug pwesto sa imong amigo nga si Mike Rama aron di na ka mag-usik-usik sa budget sa Sunstar kay ang imong trabaho imbis nga mo-umol ka ug maayong mga hunahuna pinaagi sa paghisgot sa mga isyo nga tinarong ang imong gipalabi mao na man hinuon ang pagprotihir sa imahen sa mga Garcia ug ni Mike Rama. Apan way bali ining gibuhat ni Bob kay niburot man ug maayo ang iyang bulsa tungod sa iyang mga sikretong labok apan ang naalkansi mao ang lungsod kay wa niya mahatagi sa tinud-anay nga pag-aninaw sa mga mhinungdanong isyo nga may labot ang lungsod.

(Bug-os ang  pasalamat sa KAHAYAG ngadto sa magtatampo  nga si JOHNNY LOVE. Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCAÑO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 68,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata. Makadawat siya sa inyong mga hunahuna mahitungod sa iyang sinulat sa johnnylobedica@yahoo.com)