Kaban ni Atty. J. B. Jimenez: KINAADMAN


Anaa Na Sa Imong Mga Kamot,
Ang Bunga Sa Imong Paningkamot,
Imo Na Karong Hugot Nga Gihuptan,
Ang Sulo' Sa Matin-aw Nga Kinaadman,
Himo-a Kana Nga Iwag Niining Mangiob,
Nga Kalibotang sa Mga Hagit Natugob,
Himoa Kanang Taming Nga Panagang,
Sa Mga Hampak Sa Unos Nga Maka Kugang,
Buhata Kanang Bugsay Sa Imong Paglawig,
Nga Puno' Sa Paglaum, Pangandoy Ug Pagsalig.

Padayon Sa Pakigsangka Sa Kinabuhi,
Likayi Ang Mga Linlang Ug Pagbudhi,
Lig-ona Ang Imong Baroganan Sa Tanan,
Nga Mga Gumonhap Ning Kalibotan,
Atubanga Ang Mga Babag Sa Imong Panaw,
Ayaw Kahadloki Ang Mga Dautan Nilang Laraw,
Pag Pabilin Pag Baktas Sa Dalan Nga Tul-id,
Tungasa Ang Mga Bungtod, Bakilid Ug Bukid,
Kay Anaa Naman Sa Imong Kamot ang Kinaadman,
Iwagi Ang Mga Nagduhiraw Mong Mga Kaigsuonan.

Ayaw'g Gamita Ang Kalantip Sa Imong Utok,
Aron Kasilagan Ug Panimaslan Ang Kanimo Nakigbatok,
Hinonoa, Tun-i Ang Kinaadman Sa Pagsabot Ug Pag Pasaylo,
Lamdagi Ang Imong Tanlag Kon Usahay Sa Gugma Kini Mailo,
Tindogi Ang Katarongan Bisan Kon Ikaw Na Lang Ang Mahabilin,
Bisag Talikdan Ka sa Tanan, Aywa Baya Ug Pagbalhin,
Higugmaa ang Imong Inahan Nga Dako Kaayo Ug Sakripisyo,
Aron Matuman ang Imong Damgo Ug Malikay Sa Perhwesyo,
Choy, Bisan Kon Wala Kaayo Kita Magkasuod Sa Mubong Panahon,
Nasil-ingan Ko Nga May Naghulat Kanimong Hayag Nga Kaugmaon. . . . .

KAY MAY USA KA INAHAN NGA MAOY NAGTUNOL SA SULO'...
SA KINAADMAN BISAN PAG SINGOT UG LUHA' ANG GIPATULO'. . . . .



(Bug-os ang pasalamat sa  KAHAYAG  ngadto sa nagsulat sa  garay   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK. Hinubad kini sa garay nga gisulat mismo ni Atty. Jimenez sa pinulongang Iningles, "WHEN APRIL BLEEDS NOSTALGIA. Halad kini apasumpay sa paambit nga naghisgot ug GILOK sa nataran sa LAB-OK)

Comments

Popular Posts