Kaban ni Inting Botikol (JSL): BIYUDA APAN SIGE PA

"Hu! huh! hu! Pisyong nganong gibiyaan mo kami..." naghilak si Toyang

Hu! huh! hu! Pisyong nganong gibiyaan mao man kami. Gagmay pa intawon ang imong mga anak nga imong gitalikdan, pwerteng minatay ni Toyang atubangan sa haya sa iyang bana. Alta presyon ang namatyan ni Pisyong kay sige man siya’g kaon og humba, adobo, lechon ug uban pang mga pagkaon nga tambok ug mantikaon. Dugang pa niini, hinginom sab siya og tuba o beer ba hinuon. Gumikan niini, sayong mipanaw si Pisyong. Kuwarenta anyos pa ang iyang edad.

“Pisyong, ipanumpa kong di na gyud ko magminyo pag-usab kay in-love kaayo ko nimo.

“Pisyong, ipanumpa kong di na gyud ko magminyo pag-usab kay in-love kaayo ko nimo. Bisan pa’g mabaliktad ang kalibutan dili na gyud ko,” dugang panumpa ni Toyang sa haya sa minatay.

Pilay estorya, gilubong na si Pisyong biniyaan ang iyang batan-ong asawa ug duha ka mga gagmay’ng anak.

Dangtan pa gani og tulo ka buwan sukad sa iyang pagkabiyuda may nag-ibid-ibid na ni Toyang nga si Ponso usa ka hamtong ulitawo nga may gamay’ng yuta ug may mga binuhing kahayupan.

Wala dugay-dugaya ni Toyang ang pagdawat sa gugma ni Ponso kay iyawat lang kuno nga may kabangkilya ug katabang na siya sa pagpadaku sa iyang mga anak.

Tulin nga miligid ang panahon, nakaanak si Toyang og duha ka buok kang Ponso entonses upat na tanan ang iyang mga anak. Kumo kay batan-on pa lagi si Toyang, kusog pa kaayo ang iyang naturalisa sa romansa ug pagkighagwa sa lantay.

Usa ka higayon, nagluya si Ponso kay misuol ang iyang rayuma ug pamugnaw sa kalawasan apan gipatongan siya ni Toyang nga uhaw kaayo sa lawasnong kahinam ug kalipay.

"dili na gyud ko mousab, kausa na lang."

Unsa ba tong pagkahitaboa nga gitakigan man siya ug gitabang apan DOA kon dead on arrival na siya sa pag-abot sa ospital kay nalunhat kuno siya.

Nabiyuda na sa ika-duhang higayon si Toyang. Nag-inusara na usab siya uban sa upat ka buok anak. Lima pa lang ka bulan ang nakalabay, nagkaabot na usab si Toyang og si Pascual nga biyudo usab. Nagpuyo sila hangtud nakaanak sila og tulo ka buok.

Usa ka higayon niana, samtang nag-inusara si Toyang samtang nagtambo siya sa ilang bintana ug halayo kaayo ang iyang panan-aw nagkanayon siya sa iyang kaugalingon,” dili na gyud ko mousab kausa na lang.”

Ning puntoha, si Toyang gianggaan sa ilang dapit nga biyuda apan sige pa. (KATAPUSAN).




(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos).