Kaban ni Inting Botikol (JSL): BATANG LINTI SI SEBYO



“Agay, kasakit sa akong nawong!!! Nganong gitamparos mo man ako? Unsa may akong sala?” pangutana ni Arthur nga nagping-it sa hilabihang kasakit nga mora’g  nakakita’g  aninipot niadtong higayona.

“Ayaw ug palag ha,  wala kay sala. Ang imo lang pamarog nga artistahon akong nasuyaan. Hala lakaw na!” singhag ni Sebyo nga mapasigarbohon kaayo atubangan sa iyang mga barkada nga nangatawa. 

Usa lang kini sa mga binuhatan ni Sebyo kon sul-an na siya sa iyang kamaldito. Tungod niini naila siya sa ilang lugar sa Lopez Jaena  sa angga, “batang linti” kon subra kagahian ug ulo, taspokan,  ug masinupakon nga pagkatawo.

Nakapanglingo-lingo si Sebyo ning kahaponon samtang naglantaw siya sa mga batan-on nga nagkalingaw ug inom sa usa ka galong tuba sa tindahan ni Inse Basing.  Nalunhaw sa hunahuna ni Sebyo ang panahon sa iyang kabatan-on.

Mao kini ang iyang  kasinatian samtang tin-edyer  pa siya kaniadtong nagtungha pa siya isip estudyante sa elementarya sa Tejero Elementary School ug sa   hayskol  sa USP Mabini Unit, nahimutang sa  siyudad sa Sugbo.

Masuko si Sebyo kaniadto kon dunay motutok-tutok niya.  Gaan kaayo siya ug kamot nga makasawilik ug tamparos sa binuhat nga dili niya mauyonan.  Nadasig kaayo ang batan-ong hunahuna ni Sebyo sa iyang idolo sa salida niadtong panahona nga si Asiong Salonga nga gidala ni Erap Estrada ug  gikuninitan sa mga sinehan sa tuig 1964.

Gikaintapan si Sebyo ug nabaniog ang iyang pagkabadlongon sukad pa sa iyang pagtungha sa Tejero Elementary School nga nahimutang diha sa dalan Martires nga karon M. J. Cuenco na.

Gani, makadaghan na siya’ng nakasulay ug suspenso sa ilang eskuylahan gumikan sa “drunkenness during classes, extortion ug hooliganism kon pagpanghagis sa dihang nagtungha na siya isip estudyante sa hayskol sa USP Mabini sa mga tuig 1967-1968.

Sugo-on ni Sebyo kaniadto ang iyang mga bata-bata sa pagpangilkil ug salapi sa mga tawong lumalabay sa ilang estambayanan para inom ug Anejo Rum ug palit ug plaka sa kanta nga patokar-tokaron niya sa ilang “radio-phono” sa balay. Mahiligon kaayo si Sebyo sa mga huni nga awit sa Beatles, Gary Lewis, Hollies, Hermans Hermits  ug uban pa.

Mangulata, manamparos ug magkalisod mosangpot pa sa pagkaospital ang mga binuhat nga mahiagom sa mga kamot ni Sebyo nga  dili  makapugong sa iyang kapungot  ug kasuko kon dili matuman ang iyang gusto.

Dihay usa ka higayon, nakulatahan  niya ang anak sa usa ka polis.

Nadakpan si Sebyo ug gidala sa patrol car  ngadto sa Ramos Police Station kaniadto.
“Pastilan nimo Sebyo, nakabayad hinuon ta ug singkuwenta pesos sa imong binuang.” langgis nga tingog sa iyang inahan nga si Mama Rosa niya samtang nag-asikaso sa pagpagawas kaniya sa bilanggoan ug human usab makatunol ug singkuwenta pesos isip areglo sa nasumbagan ni Sebyo.

Dako na ang singkuwenta pesos kaniadtong panahona sa tuig 1966. Karong panahona, Ninoy Aquino kon kinyentos pesos ang katugbang niana.

“Kon dili ka na magtinarong, hayan mapareha ka ni Jaime Jose nga gipaig sa silya elektrika.” pahimangno pa sa iyang inahan samtang nagdigamo sa ilang paniudto.

“Lo,  imong tambal sa rayuma ako nang napalit.”  nabati ni Sebyo ang tingog sa iyang apo nga si Loklok nga nakapapugwat sa iyang paghanduraw.

Nagpunting ang iyang panan-aw sa eskina nga giimnan ug tuba sa mga batan-on. Sa maong eskina naumol ang tipaka sa kagahapon ni Sebyo nga nanumbalay sa iyang pangisip karong hapona. Igo na lamang siya sa paghandum sa iyang pagkabatan-on!!

Mosaysenta anyos na ang iyang pangedaron. Luya na ang iyang mga lutahan ug tuhod, dili sama kaniadto. Matag karon ug unya, atakehon siya ug hutoy. Natakbuyan na usab siya ug rayuma kon “arthritis”  ug “diabetes”.  

May mga apo na si Sebyo. Naputos na sa kunot ang iyang nawong  ug kanunay na pud siyang mogamit ug Bigen para ipatina sa iyang buhok dala salimbong sa iyang hamtong nga pangedaron. 

Maapsan gyud ang edad sa tawo sa dagan sa atong panahon matag karon ug unya bisan ug unsa pay kahimtang ug hut-ong sa katilingban.  (KATAPUSAN).



(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos, Napatik kining maong artikulo sa Banat News kaniadto Enero 7, 2012).  




Comments

Popular Posts