Kaban ni Inting Botikol (JSL): ANG BIGOTELYO NGA PRESIDENTE

Erap Estrada

Ang ika-trese nga Pangulo  sa Republika sa Pilipinas mao si Joseph "Erap" Estrada.

Milingkod siya sa Malakanyang isip pangulo sa nasud kaniadtong Hunyo 30, 1998 apan wala siya makatapos sa iyang termino gumikan sa People Power EDSA Revolution 2 nga gihimo didto sa kaulohan kaniadtong Enero 20, 2001.  Natawo si Erap kaniadtong Abril 19, 1937 sa Tondo, Manila. Ang iyang mga ginikanan mao sila si Emilio Ejercito ug Maria Marcelo.

Ang tinuod nga pangalan niya mao si Jose Marcelo Ejercito.

Nagtungha siya sa Mapua Institute of Technology sa kursong Enhinyero apan wala siya makatapos kay misulod man siya sa pagka artista kon actor sa maputing tabil kon sinehan.

Misulod siya sa politika sa 1967 ug nahimong Mayor sa San Juan, Manila.

Apan paglingkod ni Cory Aquino isip Presidente kaniadtong Pebrero 25, 1986, giilisan siya sa usa ka OIC kon Officer-in-Charge.

Sa eleksyon sa 1988, nakadaug siya isip Senador sa Pilipinas ubos sa partidong Grand Alliance for Democracy (GAD).

Napili siyang Bise-Presidente sa piniliay sa 1992 ug napili na gyud siyang Presidente sa  Pilipinas sa eleksyon sa 1998.

Milansar siyag balik sa pagkapangulo sa nasud kaniadtong piniliay sa Mayo 11, 2010  ug siya ang nagtala sa ikaduhang dapit sa mga napili  pagkapangulo sunod ni  Noynoy Aquino nga karon kasamtangang naghupot sa renda sa pangagamhanan isip Pangulo sa Pilipinas.

Si Erap Estrada ang unang Pangulo sa  Pilipinas nga napriso gumikan sa kurapsyon  ug sa “jueteng scandal”. Kinsa kaha ang sunod nga Pangulo  nga mahiagom sa susamang  pagkakonbikto ug  pagkapriso ni Erap?

Nakagawas na si Erap sa prisohan kay gihatagan man siya ug “amnesty” ni Kanhi Presidente Gloria Macapagal Arroyo!.

(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos. Kining maong artikulo napatik sa Banat News kaniadtong, Mayo 21, 2012, Lunes).