Kaban ni Inting Botikol (JSL): ASAWA NGA PALAANAK

Si Panyong ug Kathy
"Sus, Panyong nagsige man gihapon ka ug paningkamot diha ug pasabot sa imong pagkahingatkat ug kapayas oi. Unom na intawon kabuok ang atong anak, ug mga gagmay pa ra ba ni sila." singhag ni Kathy nga nagdala ug pahiyom. Gikang naligo ug nagtapis lang si Kathy samtang  nangita ug kailisan.

"Ayaw na lang ug saba diha. Kinsa man goy dili ganahan nga imo man kong gilutoan sa akong paboritong lansiao ug bakasi." pulong pa ni Panyong nga walay pupamilok nga nagpunting sa iyang tutok ngadto sa tinagoang bahin sa lawas ni Kathy nga gitapisan.  

Pipila ka gutlo ang misunod, nahimong kalandrakas sa mamingawng kagabhion ang pagtugkad ni Panyong sa  gitapisan ni Kathy. 

Tuod man, ang kakugihan ni Panyong sa paghimo ug bata ug ang pagkamaabiabihon ni Kathy sa walay puas ug kakapoy nga pagsige ug pangablit sa iyang bana, nakapaturok  gayud ug dugang upat pa ka mga anak. Nahimong napulo ang tanan human sa hapit matag tuig nga pagkatawo sa mga bata. Naghinagdan ang bayhon sa mga bata tan-awon tungod sa halos matag tuig nilang pagkatawo isig usa. 

May traysikol silang pasaheroan. Si Kathy usab adunay "sari-sari store" nga giatiman gawas sa pagsige'g panganak. 

Batan-on pang naminyo si Kathy ug Panyong. Igo lamang silang duha nakatapos sa hayskol, nagminyo dayon  sila. 

Usa ka higayon niana, nagdala ug DVD Player si Panyong gikang namasahero. 

"Unsaon man na nimo ang DVD Player?" nangutana si Kathy.

"Ay da, nindot ni kay samtang nia ta sa balay, magkalingaw ta ug tan-aw ug mga bag-ong urog sa paghimo, paghulma ug pag-tisok ug liso sa atong gugma.     Maayo na lang ni Kathy kaysa mutan-aw ta ug salida sa Carbon Mall. Gawas nga mahal, wala pa gyud tay mapupo nga pagtulon-an, pabug-at lang sa bulsa ang atong mahiagoman. Tiaw mo bay tag P450.00 ang bayad matag ulo sa manan-aw sa salida kanang ang imong makita molutaw, molupad unya murag motuslok sa imong mata ang mga espada sa mga tawo sa salida. IMAX man kuno ning klaseha sa salida. Basta mas nindot ning akong dala kay duna  gyuy dakong karatola sa hapin ang DVD, "For Adults Only". dala kahigwaos  nga pamulong ni Panyong samtang nagbukhad ug banig preparasyon sa pagsulod niya sa himaya uban sa iyang kapikas. Presko si Panyong human makaligo sa may atabay duol sa ilang balay.  

"Kathy, pangandam na diha, nakapanabon ra ba ko  niadtong salin nga sabon nga imong gigamit ug panglaba ganinang buntag. Natangtang  ang tanan nakong  buling, bun-i ug mga katolkatol.   He, he, he. Dila ray walay labod nimo karong gabhiona." 

"Nyong, ayaw intawon palabi oi. Matuk-an man pud ta nimo sa imong kakusog. Matag tikyop sa kagabhion,  molagsik ka man lang ug kalit unya murag dili gyud bation ug kakapoy. Ninipis  na baya na imong dunggan, sapyot na kaayo ka,  dangas na pud kaayo ang imong agtang, unsaon malarot man gud na nako labi na kon ligiron ko nimo ug hagwa sa imong pagkapilyo matag gabii.  Unya ang  imong bungot, pagkalabong ba, pamarbas pud oi." ni Kathy nga nagyaka kilid sa gibukharan ni Panyong ug banig. 

"Ayaw na intawon kog langana Kathy, bahala na ug unsay imong isulti basta hatagi lang intawon  ug katumanan kining akong gibating kainit aron sa makausa pa, ikapabuhagay nako ang tanang kahigwaos nga miulipon kanako karon."

"Panyong, panahon na aron magpakapon ka. Dili maayo ang atong padulngan kon magsige lang ta ug padala sa atong kahinam ug kaungo sa paghimo ug bata. Subra na, hunonga na ang atong kalisod Nyong ug tabangi ko nga makabaton ug kusog nga makabalibad nimo. Ayaw intawon ko sigeha ug tintal, kay puyra buyag, agdahonon pud ra ba kaayo ko sa imong gusto matag gabii."

Naghinuktok si Panyong. Nauknol. Sa unang higayon sa taas nga katuigan nilang panagpuyo, nabati ni Panyong ang pagbalibad ni Kathy. Nasabtan niya si Kathy. 

"Tinuod ka Kathy?  Salamat sa imong pagpaamgo kanako." gidip-ig ni Panyong ang  iyang aping ngadto sa iyang kapikas. 

"Nyong, magtinabangay ta. Palihug ang imong kusog ug kakugi sa pamugas maoy atimana ug gamita ang imong pagkahingabayo sa atong traysikol aron makatagamtam ta ug maayong ugma alang sa atong napulo ka anak." ni Kathy nga mipatulo ug luha sa kalipay. 

Karong panahona nga krisis kaayo, kinahanglan gyud kaayo ang pagplano ug pagkontrol sa atong pamilya aron kahatagan nato ang atong mga anak ug maayong kaugmaon ugma damlag gikan sa edukasyon, pagkaon ug pamisti. (KATAPUSAN). 



(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos. Napatik sa Banat News kining maong sugilanon kaniadtong Hulyo 14, 2012). 
 




Comments

Popular Posts