K U N O T

Timailhan kini nga  dili hapsay tan-awon ang usa ka butang. Ang lawas, mababaye man o malalaki, maabtan usab ug kunot. 


 Mahimo kining  dibuho sa hulagway'ng mug-ot, murag gikumot-kumot ug dakong kamot, 


Makita kini isip kabahin sa atong kalawasan, mubathay ug sayon makit-an sama sa kunot sa agtang.


Mas  bantayanan ang kunot sa  kinahiladman, ang kunot  nga  nagbukot sa bayanan, lunlon kunot tan-awon, ug dili pahilabtan,


aron dili mapanuhotan, dili ipaigo, likaya'ng dili mapatiran, ampinganan, gasa kini sa kaliwat ni Adan, sagrado ug  tinagoan.  




"Juana paglung-ag na didto. Nasige ka man lang gud  diha ug hinuktok. Imong nawong nagmug-ot, napulos kunot." pulong ni Juan ngadto sa iyang kapikas dayong paturatoy ug lakaw sa unahan, nagbarog-barog, murag adunay gipaabot. 


"Pasagdi ko,  Ikaw gyud  Juan,  dili pa man tinuod klaro kaayo nang imong mga kunot tan-awon apan sayod ko nga  ang  baga nimong kunot makita dinha sa imong  tinagoan. Pagbantay ha, hait pa ra ba kaayo nang imong bungot tan-awon,  basin ug pawala-wala lang ka,  pero  imo diay'ng gireserba nang imong kusog sa uban?"dala sulog-sulog ni Juana ngadto sa iyang bana. 


"He, he, Juana baya wala na gyud intawon koy umoy sa atong pangedaron nga tag kan-uman ug lima. Sumala man bitaw, napulos na lang bayanan kining giputos sa tinaguan kong kunot, ug ihangad ko na lang sa kahitas-an ang tanan." ni Juan pa dayong hangad. 


"Ikaw gyud Juan, pagkadukirok gyud nimo, Nagdalidali ka ug hangad  kay nagpatungod man pud ka sa pantawan sa atong silingan. Unya imo gyung gidungan ang imong paghangad sa dalagang nagpaantaw."


"Ngek, nasakpan ko ni Juana.,  naklaro tuod niya nga nagpailawom ko diri  sa silong,  ubos sa pantawan nga gibarogan sa among bag-ong silingan." pamulong ni Juan sa kaugalingon.   


"Dali na Juan, pauli na diri pagsag-ob ug tubig aron makadigamo na ko sa atong panihapon."


"Mao kini ang kinabuhi, mokalma na gyud ko labi na karon ning panahon sa pagpangunot." nakapalandong si Juan sa kamatuoran. 

"

Comments

Popular Posts