Kaban ni Atty. J.B. Jimenez: KON ANG ABRIL MAG BUHAGAY SA MGA HANDUMANAN

Gihagkan Ko Ang Sidsid Sa Imong Baybayon,

Diin Nag Dagayday And Gagmayng Balod Nga Badlongon,

Gigakos Ko Ang Dughan Sa Imong Lapyahan,

Diin Nagbuhagay Ang  Katam-is Sa Dugos Mong Tinaguan.

Gilab-ok Ko Ang Tinagay Nga Duga' Sa Imong Hinog,

Pinupo' Sa Kaluhang Bungtod Nga Nanag Buntaog.

Gikan Sa Kopa Sa Inampingan Mong Himaya',

Gidimdim Ko ang Langitnong Yamog Sa Dakong Kasaya'

Kon Ang Abril Sa Atong Gisaw-an Nga Kaagi,

Manalingsing Ug Handumanan ang Hinulmang Gabii,

Kon Ang Boracay Nga Gipangahasan Ta Kausa,

Diin Gihatagan Tag Kagawasan Ang Pagbating Nagkahiusa,

Kon Ang Yamog Sa Kagabhion Didto Sa Maong Baybay,

Mamunga Ug Mga Tipaka Sa Kinawatkawat Nga Kalipay,

Kon Ang Abril Nga Atong Inuslan Sa Kahayag,

Maoy Maga Hatod Ug Himaya Sa Bilanggo Tang Tanlag.

Tag-init  Kadto Diin Gibilin Nato Ang Mga Tunob,

Sa Baybayong Kaingon Nato Ug Wala Nay Kutob,

Apan Lumalabay Lang Diay ang  Adlawng Naglagiting

Madaling Mapapas Ang Tunob Sa lapyahan Sa Kasingkasing,

Karon, Ania ako Sa Baybayon  Nga Nag Inusara, Uban,

Ang Kopa Nga Buak Nga  Sa Dugos Mo  Nahubsan,

Nagsud-ong Ako Sa Mabasolong Kilomkilom,

Mobuhagay  Na Sa Kasadpan Ang Unos Luyo Sa Dag-om.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)